الحصيلة الوبائية لفيروس كورونا فهاد 24 ساعة: 135 تصابو و85 تشافاو و2 ماتو.. الطوطال: 8437 مصاب و7493 متعافي و210 متوفي .. وعدد المخالطين تحت المراقبة وصل ل6817

علنات وزارة الصحة على تسجيل 135 إصابة جديدة بفيروس كورونا المستجد فهذ 24 ساعة الأخيرة، أي من الستة دالعشية لبارح الأحد حتى للستة دالعشية اليوم الاثنين، وهكذا وصل عدد المصابين فالمجموع ل8437، أي بمعدل 32,2 لكل 100 ألف نسمة.
وقال معاذ المرابط، منسق المركز الوطني لعمليات الطوارئ العامة بوزارة الصحة، فالندوة اليومية للترصد الوبائي لفيروس كورونا المستجد، أنه تسجلات 85 حالة شفاء اليوم، ووصل المجموع ل7493 حالة، بنسبة تعافي ديال 88,8 فالمية.
وكشف المرابط أن جهة كازا سطات هي اللي سجلات أكبر عدد من الإصابات اليوم (79)، 71 منهم من بؤرة مهنية و8 حالات ديال مخالطين، طنجة تطوان جات فالمركز الثالث ب35 حالة، بعدها مراكش آسفي ب15 حالة، 4 حالات بفاس مكناس، وجوج حالات بالرباط سلا.
ومن هاد 135 إصابة اللي تسجلات اليوم، تم اكتشاف 118 عن طريق عملية تتبع المخالطين، وهكذا وصل مجموع المخالطين ل49264، وبلغ عدد المخالطين تحت المراقبة ل6817.
وتسجلات اليوم 2 وفيات بكل من طنجة ومراكش، كانو فقسم العناية المركزة، وهكذا وصل المجموع ل210 ، واستقرات نسبة الإماتة ف2,5 فالمية.
وعدد الحالات النشيطة بلغ 734، أي بمعدل 2 لكل 100 ألف نسمة، أغلب هاد الإصابات كتتوزع فكازا سطات (288)، ومراكش آسفي ب161، ثم طنجة تطوان ب137 حالة نشيطة، بينما جهة درعة تافيلالت والداخلة واد الذهب ولاو خاليين من الحالات النشيطة.
وتم استبعاد 16733 حالة إصابة بالفيروس اليوم، ووصل عدد الحالات المستبعدة فالمجموع ل331134 بعد ما خرجات تحاليلهم سلبية.
وبالنسبة للحالات اللي كاينين فالإنعاش فكيبلغ العدد ديالهم 13، أغلبيتهم كاينين فكازا (8)، 3 فطنجة، و2 فمراكش، ومنهم 5 تحت التنفس الاصطناعي.
وهذا التوزيع الجغرافي للإصابات بالنسبة المئوية: