الحصيلة الوبائية لكورونا فهاد 24 ساعة: 68 تصابو و73 تشافاو وحتى واحد ما مات.. الطوطال: 8071 حالة وبقاو غير 595 مصاب تحت العلاج

علنات وزارة الصحة على تسجيل 68 إصابة جديدة بفيروس كورونا المستجد فهذ 24 ساعة الأخيرة، أي من الستة دلعشية لبارح الخميس حتى للستة دالعشية اليوم الجمعة، وهكذا وصل عدد المصابين فالمجموع ل8071، أي بنسبة 22,2 لكل 100 ألف نسمة.
وقال معاذ المرابط، منسق قسم الطوارئ الصحية فوزارة الصحة، فالندوة اليومية للترصد الوبائي لفيروس كورونا المستجد، أنه تسجلات 73 حالة شفاء اليوم، ووصل المجموع ل7268 حالة، ونسبة تعافي وصلات ل90,1 فالمية.
وما تسجلات حتى وفاة اليوم، واستقر المجموع ف208 ، أي بنسبة إماتة استقرات ف2,6 فالمية.
والحالات النشيطة بلغ عددها 595 حالة فقط، أغلبها كاينين فجهة كازا سطات (275).
وتم استبعاد 14271 حالة، ووصل عدد الحالات المستبعدة فالمجموع ل267278 بعد ما خرجات تحاليلهم نيگاتيف.
وفهذ 24 ساعة، جهة مراكش هي اللي سجلات أكبر عدد ديال الإصابات (31)، منها 27 حالة كتتعلق ببؤر صغيرة عائلية مرتبطة بالبؤرة الكبيرة اللي تسجلات لبارح، من بينهم 11 طفل من مجموع 41 طفل فهذ البؤر ككل، وكلهم بصحة جيدة.
بالنسبة للجهات الأخرى، كازا سجلات 18 الحالة ، طنجة تطوان 8، الجهة الشرقية 6، جهة الرباط سلا 5، بينما باقي الجهات ما سجلات حتى اصابة.
ومن هذ 68 حالة اللي تسجلو اليوم، تم اكتشاف 62 عن طريق عملية تتبع المخالطين، ووصل عدد المخالطين اللي مازالين قيد التتبع ل7176.
بالنسبة للحالات اللي كتواجد فالإنعاش، فحسب المسؤول انخفضات ل18 لحالة فقط، و5 منهم تحت التنفس الاصطناعي.
وهذا التوزيع الجغرافي للإصابات بالنسبة المئوية: