عشنا وشفنا حتى ولى الحريكَ بين مدن المغرب.. المغاربة مطلعينها على قرار الداخلية الجديد: صحاب المنطقة 2 كيفكرو يحركَو للمنطقة 1 ويتهناو من كورونا

ف"فيسبوك"، مجموعة من الناس فالكَروبات ساركازماو مزيان على قرار وزارة الداخلية ووزارة الصحة بشأن تخفيف الحجر فأقاليم "المنطقة 1" وتشديدو فأقاليم أخرى "المنطقة 2′′، وبزاف منهم كيقتارحو فكَروبات "الكوفواتيراج" بالضحك لوفر ديال الحريكَ ل"المنطقة 1′′، باش زعما الأشخاص اللي فالمنطقة اللي زيراتها الحكومة بسباب انتشار فيروس كورونا المستجد يمشيو للمناطق اللي يقدو يخرجو فيها ويتحركو بحرية بدون قيود.
واحد حط السكرين ديال الكونفيرساسيون ديالو مع صاحبو، كيقولو فيها بللي داير "أوفر" ديال الحريكَ ل"المنطقة 1′′، السيد اللي عوال يحركَ من بنسلمان لشي بلاصة "آمنة" مستعد يخلص حتى مليون ونص، باش يهرب من كورونا ويمشي لمنطقة فيها الدوران مخفف، وحاط السكرين فمجموعة خاصة بصحاب "المنطقة 2" باش يعاون فجميع البلايص، ويتحسب عليه ثمن معقول.
واحد آخر كيتفلى ويطنز، حط منشور فكروب ديال "الكوفواتيراج"، كيقول فيه بللي مستعد يحركَ بيهم من كازا ل"المنطقة 1′′ ف"فلوكة" ب1500 درهم، الناس تجاوبو معاه بشكل كبير وبغاو يستفدو زعما من لوفر ديالو، وكاي منهم اللي بين بالصح على الرغبة ديالو فالهروب من كازا بأي طريقة.
أبار هذو اللي طانزين، كاينين دي دوموند فري وبزاف فليكَروب ديال "الكوفواتيراج"، كيطلبو من خلالها الناس باش يديوهم من كازا لسطات، أو لخريبكَة أو بني ملال، أو آسفي أو مكناس، ولا شي جهة فالشمال من غير طنجة ولا العرايش، أو مناطق الجهة الشرقية والجنوب، وهذو كلها أقاليم كتنتمي للمنطقة الآمنة، وممكن إلى وقع هذشي وهاجرو الناس ل"المنطقة 1" غادي يقدرو شي وحدين ينقلو عدوى كورونا لناس خرين فمناطق استطعات تسيطر عليها.
والبارح الداخلية ووزارة الصحة دارو بلاغ مشترك، حددو فيه المناطق اللي تخفف فيها الحجر الصحي والمناطق اللي مازال خاص ماليها يصبرو شوية، واللي جمعاتهم فمنطقة التخفيف 2، وهوما مدن طنجة، وأصيلة، والعرايش، وفاس، والحاجب، والرباط،وسلا، والصخيرات، وتمارة، وقنيطرة، وكازا، والمحمدية، والجديدة، والنواصر، ومدديونة، وبنسليمان، وبرشيد، واخيرا مراكش.