واش مستشار الملك من حقو يهاجم زعيم حزبي؟ اگنوش: الفاسي الفهري ما خرجش للتلفزيون الا بامر ملكي باش يرد على شباط وعلى خيرو وهادي ماشي هي الاولى

عبد اللطيف اگنوش استاذ باحث جامعة الحسن الاول سطات ////
لا آوليدي..مستشار الماليك كايدوي للصحافة، وهاذ الشي من مهامو مللي كايعطيه الماليك الأمر بذلك…الماليك مامساليش ليك للتيلفزيون وللصحافة !!! ومللي ماتعرفش سوول الناس للي كبار منك…
موقع "كود" تكلم على الطيب الفاسي الفهري، مستشار الماليك، وكًالت بللي طلع للتلفزة في "الأولى" باش يتكلم على حيثيات "عودة المغرب لمنظمة الدول الإفريقية"، والصعوبات للي واجهها المغرب في مسلسل هاذ العودة…وبهاذ المناسبة السي الفاسي رد "على تصريحات شباط وللي وصفها بغير المسؤولة، وأنها كانت من وراء الصعوبات للي عانا منها المغرب مع العديد من الدول الإفريقية، ومنها موريطانيا براسها"…وهذا صحيح، ما يمكن ينكرو غير شي واحد للي غير حالل فمو ويدووح، وعينو في الفاسي الفهري…لأن الموقع مشا بعيد مللي وصف السيد بللي "كان كايقفقف وضعيف ومهزوز ويترععد بحال إيلى فيه الفقصة" ! هاذ الكلام في جميع الأحوال غير "حكم قيمة" للي ماكانتقاسموش معا صحابي في الموقع، وهذاك شغلهوم..
ولكن للي هو مامزيانش كًاع، هو أن صاحب المقال كًال بالحرف: " السؤال واش مستشار الملك اللي دورو معروف، وهي مؤسسة قائمة الذات، عندها الحق تخرج علنيا وتدير تصريح بحال هاذا؟ هادي ما عمرها كانت !"
لا آحنيني "هاذي كانت وبززاف"، وهي ماشي سابقة لعدة اعتبارات:
1- أن المستشار الفاسي الفهري، ماخرج للتلفزة إلا لأنه تلقى الأمر من الماليك باش يخرج للتلفزة ويدوي معا المغاربة، ويرد على شباط وعلى غير شباط…هاذا ماشي اللعب، هاذي راها السياسة الدولية، والفاسي راه مستشار ديال الماليك في مجال العلاقات الدولية للي هو "مجال محفوظ للملك" بمقتضى الدستور، ماشي باللعيقي…واش بغيتي نتا الماليك يجيك للتلفزة ويرد على شباط للي كًال كلام ننيت "غير مسؤول" وكان غادي يقوودها على البلاد، وحط الدولة في موقع لا تحسد عليه؟؟ واش بغيتي فين ماناضت شي روينة، الماليك يجيك للتلفزة؟؟؟ هاذي يا إما قلة العقل يا إما قلة الحيا…
2- أما قضية "هاذي ما عممرها ماكانت"، راها غير تخرميزة وانعدام معرفة بالتاريخ السياسي ديال البلاد…مرات ومرات خرجو مستشارو الماليك للصحافة المكتوبة وللراديوهات وللتلفزات لأن الماليك كللفهوم باش يديويو في بلاصتو، لأنه هاذاك الشي كايدخل في خدمتهوم…علاه ما عقلتيش آعزيزي على خرجات المرحوم أحمد رضا اكديرة في جريدة "المنار" في 1962 كايدافع على "السلطة التأسيسية" ديال الحسن الثاني في مواجهة الاتحاد الوطني للقوات الشعبية وفي مواجهة العلامة بلعربي العلوي؟؟؟ رجع آوليدي لهاذ الكتابات للي صبحات "مؤسسة" في تاريخ القانون الدستوري المغربي، وللي خلات الخرازا ديال البيجيدي يمشيو في نفس الاتجاه للي رسمو ليهوم رضا اكديرة هاذي اكثر من 50 عام ويطلبو غير السلة بلا عنب أثناء تحرير دستور 2011 !! علاه أعزيزي ماعقلتيش على خرجات خويا وعزيزي سي محمد معتصم في التيلفزيون وحتى في الأحداث المغربية منذ بداية التسعينات كايدافع فيها على "مفهوم الدستور" وعلى الغرض من التناوب "التوافقي"؟؟ علاه معتصم كان كايدوي بسمييتي أنا؟؟؟ وراني من الشهود العيان على هاذ الوقائع والخرجات الإعلامية آحنيني…وماندويش ليك على المرحوم إدريس السلاوي للي كان "زيزون" حتى مللي كان كايقرري في كلية الحقوق بالدار البيضاء، ولكن كايولي ثراثار، مللي كايعطيه الحسن الثاني الأمر باش يديوي للصحافة، واخا كانت خرجاتو محسوبة ومدروسة بزاف لأن التكوين ديالو الأصلي "بوليسي" !!