مؤطر طبي مغربي فبلجيكا فتصريح ل”كود”: كاين حالات من الجالية المغربية تصابو ب”كورونا”

باش تسولو على حالة المغاربة فبلجيكا مع انتشار وباء “كورونا” فالبلاد، تواصلات “كود” مع مغربي كيشتغل كأستاذ مسؤول على تأطير الأطر الطبية فمجموعة من المراكز الصحية ببروكسيل، اللي كشف على مجموعة من الحقائق المثيرة.
نبيل أكنوش هو أيضا كاتب وشاعر مغربي معروف ف الاوساط الادبية ف بروكسيل.
اكنوش قال فتصريحو ل”كود” بللي السبيطارات فبلجيكا كتتحفظ على ذكر أسماء وجنسيات المصابين بالفيروس باش ماتخلعش الناس، “لكن هذا مكايعنيش أن المغاربة مامصابينش بالفيروس، بالعكس كاينين حالات كثيرة منهم، غير هو المؤكد أنو ماتسجلات حتى شي حالة ديال الوفاة فصفوفهم لحد الآن هنا”، كيف قال.
وكيشتغل المسؤول الطبي فسبيطارات “سانت إيليزابيث” اللي تسجلات فيها 34 إصابة بالفيروس اليوم الخميس، و”سان بيير”، بالإضافة لدار دالعجزة كانت تسجلات فيها جوج حالات ديال الوفاة، وقال بللي كيقوم هو والزوجة ديالو الممرضة البلجيكية بتفقد الحالة الصحية ديال المصابين بالفيروس، “وهذشي اللي خلاني ندير أنا وياها التيست لبارح، ودابا حنا كانتسناو فالنتائج اللي تقدر تخرج غدا الصباح على أبعد تقدير”، على حساب هضرتو.
وأكد بللي الوضع فبلجيكا بدا كيولي مقلق شوية بشوية، والخوف تغلب على الناس بزاف، حيت الخطورة، على حد تعبيرو، كتكمن فانتشار الفيروس بسرعة كبيرة، ولكونوا كيقتل الناس المتقدمة فالسن والناس اللي عندهم مشاكل صحية كتخلي المناعة ديالهم ضعيفة.
وبالنسبة للحجر الصحي ف كيتم فمجموعة من المستشفيات فبروكسيل والمدن الفلامانية المجاورة ليها، كيقول: “بالإضافة للسبيطارات اللي خدام فيهم كاين سبيطار “سان لوك” و”جول بوردي” و”موليير” و”بروكَمان”، ومجموعة من دور العجزة، لكن هذشي غير بالنسبة للمصابين اللي محتاجين للسيروم والدوا والعناية، وحدين خرين فصحة جيدة كيمكن ليهم يديرو الحجر الصحي فدارهم واتباع الطرق الوقائية المعروفة”.
وزاد: “هو فالمجمل الفيروس صعب ومحير وكنتعاملو معاه بحذر كبير، لأن الجهاز المناعي والنظام الوراثي ديال الإنسان يختلف من شخص لآخر، وكاين اللي دغية ممكن يشد فيه الفيروس وكاين اللي صعيب تنتقل ليه العدوى بسهولة”.
وقال بللي الناس فبلجيكا مخلوعة بزاف بحال فاش كانت مخلوعة من الأعمال الإرهابية، وشي شاك فشي، لكن الناس واخدين احتياطاتهم بشكل كبير، وبزاف دايرين الكمامات، وملتزمين بالطرف الوقائية.
وكيبلغ عدد المغاربة فبلجيكة 700 ألف شخص، أغلبهم عايشين فبروكسيل العاصمة البلجيكية.
وبلغ عدد المصابين بفيروس كورونا فبلجيكا 400 حالة إصابة.. من ضمنها 3 وفيات.