شوهة التخلي على لمغاربة برا. شوهة اخرى فسفارتنا فرانسا بوليس باريس هو اللي كيفاوض بين ديبلوماسيينا ومواطنيهم وهادي سفيرها هو رئيس لجنة المشروع التنموي الجديد يا حسرة =فيديو

فضايح بوريطة وزير الخارجية والتعاون كثيرة. خلى لمغاربة اللي حاصلين برا شي 3 اشهر ويالله بداو يدخلو. اللي دخل من الصبليون البارح حسو بحگرة اكثر فبلادهم.
دابا لمغاربة اللي حاصلين فباريس مشاو للسفارة المغربية باش يحتجو. ما استقبلهم حد ما داها فيهم حد. ماشي غير هاد الشي بل ففيديو اللي فهاد المقال٬ بوليسي فرنسي كيطلب من لمغاربة يختارو جوج باش يشوف مع السفارة ويدخلهم. كيهدرو بوثوقية. اييه فرنسي وسيط غير باش يتلاقى ناس السفارة اللي خدمتهم هي خدمة لمغاربة.
لفضيحة فهاد الشي ان سفير ديك السفارة هو شكيب بنموسى اللي كيرأس اللجنة الخاصة المكلفة بالمشروع التنموي الجديد. اش من مشروع تنموي ايلى ما قبل ما يوجد نحتارمو مواطني هاد لبلاد.
هاديك النهار لمغاربة تقلقو وعندهم الحق على تدوينة سفيرة فرانسا بالرباط قالت بالي رئيس اللجنة خبرها بتقرير على فين وصلات. واخا ما كانش هاد الشي٬ ولكن اليوم هادا بوليسي فرنسي وسيط بين لمغاربة. هادي شوهة كبر