واش بصاح بنت سفيرة المغرب فمدريد دارت خبلة ليلة 6 نونبر فمدريد ودخل وزير داخلية الصبليون؟ مصدر من السفارة ل”كود”: ما تستحقش هاد الاشاعة حتى التكذيب وهاد علاش

دابا نايضة واحد الاشاعة كتقول باللي بنت سفيرة المغرب فمدريد كريمة بنيعيش دارت خبلة فشي نادي ليلي ليلة الاحتفال بالمسيرة الخضرا وخذات ما عرفش اش نا هو وحيحات على البوليس وباللي وزير الداخلية الاسباني بالنيابة هو اللي دخل وخرجها من الكوميسارية.
كود” اتصلات باكثر من مصدر فمدريد منهم سفارة المغرب فاسبانيا. مصدر استغرب وقال “هاد الاشاعة ما تستحقش حتى ترد عليها وتقول عليها “كود”. المصدر اضاف ل”كود” “اولا باش تعرفو هاد الاشاعة خبيثة هو ان البت اصلا ما كانش فمدريد ديك الليلة. ثانيا هي معروف عليها ما كتخرجش فالليل. داخلة سوق رأسها وماشي النوع اللي تخرج وتعرا وتغوت على البوليس كيف قالت الاشاعة”
مصدر ثان قال ل”كود” ان هاد الخبر غير اشاعة “واش كتعرفو الصحف الوردية ولا الصفراء فاسبانيا والقنوات ديالهم كيف دايرة. خبار بحال هاكا راه يطلي هاد الصحف. ثم واش كاين شي وزير داخلية بالنيابة يجي وقت تشكيل الحكومة ويدير عملية بحال هادي. شفتو التخربيق” يضيف مصدر “كود”
وتوقع مصدر ثالث ل”كود” ان يكون وراء هاد الخبر شي جهة خارجية منرعجة من المغرب ومن تحركات السفارة “كاع هاد الشي صدف. لخبار تكتب ومدخلين فيه الملك محمد السادس والقصر الملكي والداخلية الاسبانية فهاد الوقت اللي البوليساريو كتاكل لعصا ودارت ندوات ولقاءات وما تسوق ليها حد”
واضاف المصدر ل”كود” “هاد الناس كيوضفو ما هو شخصي وكيربطوه بالقصر وباسبانيا باش يلعبو لعب كبير عليهم ويضربو مجهودات المغرب مؤخرا الديبلوماسية وفالسياسة الخارجية للبلاد.
وكان موقع قال باللي ابنة سفيرة المغرب في اسبانيا كريمة بنيعيش دارت خبلى فملهى ليلي فمدريد احتفالا بعيد المسيرة الخضراء، وقالو انها حيحات وغوتات على البوليس.
واضافت ذات الجريدة ان وزير الداخلية الاسباني هو اللي تدخل شخصيا باش يخرجها من الكوميسارية.