اللي خاف نجا. مغربيات خافو على صحابهم ورجالاتهم من حسناوات روسيا. دارو حج وحاجة

مغربية لابسة التوني لحمر مشادة فراجلها او صاحبها وكيتفرجو فماتش البيرو وفرانسا يوم 21 يونيو فقهوى فاربات وسط موسكو. المغربية كتسول اللي معاها على الفرقة اللي لاعبة مع فرانسا. فاسئلتها واجوبتو باينة السيدة ما كتعرفش الكورة. جات لروسيا تشوف ودير السياحة ولكن حتى خايفة من الصورة اللي سبقات المونديال على الروسيات. على الجمال الروسي “انا وصلت لسان بيترسبورگ قبل ماتش المغرب ضد ايران كريت باطو مع صحابي وطلعنا روسيات وقصرنا مزيان. ردنا لهبال هنا وكملناه فموسكو” يحكي شاب بيضاوي. الشاب قال باللي هادوك اللي معاه كلهم مرتابطين مصاحبين او مزوجين ولكن جاو هنا حيحو.
هاد الشي ما وقعش لكلشي “شي صحابنا ما خلاوهمش عيالاتهم يجيو بوحدهم. جاو معاهم كشرط باش يجيو يشوفو المونديال” يحكي كازاوي تلاقاو “كود” فموسكو بعد ماتش المغرب والبرتغال “انا عزيزة علي الكورة ولكن ما قدرتش نجي بوحدي ما خلاتنيش مراتي. الصراحة خافت علي” كيعاود البيضاوي ل”كود” وكيضحك.
فماتشات المغرب ضد ايران وضد البرتغال كانو ليكوبل وكانو عيالات حاملات. طبعا ماشي كل لعيالات جايات يحظيو رجالتهم. كاينات اللي كيموتو على الفوت وعدد من المغربيات جاو من كازا مع صحاباتهم. بوحهم شافو الماتش وتساروا ورجعو فحالهم.
صحيح ان الجمال الروسي كيصطي وهادا اللي دفع كازاوية تمنع راجلها يمشي لروسيا كاع. كتخليه ديما يسافر يشوف ناديه المفضل ريال مدريد وفين ما لعب وكان عندو التذكرة غير فروسيا دارتها معاه من الاول: اما العائلة كلها اي هو وهي والولد اللي عندو 7 سنين ولا تا واحد. فالاخير بقى فكازا وما جاش. السيدة سمعات باللي بزافت الرجال غاديين يشوفو المونديال ويحيحو.
“كود” تلاقات مع مغاربة جايبين وليدات صغار ما فايتينش 3 سنين وكاين لعيالات الحاملات اللي جاو مع رجالاتهم غير لماتش ايران فسان بيترسبورك او البرتغال ورجعو.
كلها وحيحتو. فتونس قال السفير ديالها لاذاعة تونسية ان “السفارة تلقت مؤخرا عدة استفسارات من تونسيين وروسيات بشأن إجراءات الزواج”. هاد الشي راه يالله 12 الف تونسي اللي جات تابعة المنتخب ماشي بحالنا اللي كنا فالماتش الاول 40 الف والثاني 50 الف اييه ماشي غالبيتها من المغرب ولكن كاين عدد كبير.