والي كازا متلفينو المسابح: فتحو اللا سدو. اخر عنترياتو كلوب الصداقة الفرنسي فكازا

والي الدار البيضاء حميدوش تالف هاد ليام. الحكومة كتقول خاص دعم السياحة الداخلية. رئيس الحكومة دار مرسوم يمنع فيه لمغاربة يسافرو ويحث فيه فنفس الوقت هاد المواطنين يزورو بلادهم. ولكن الولاة ولى عندهم سلطة كثر من الحكومة بعض قراراتهم كتعارض مع قرارات حكومة بنعرفة.
دابا فكازا كلشي تالف. كاع الدراسات قالت باللي السباحة فالبيسينات ما كتعرضش اللي كيعوم للاصابة بكورونا فيروس. الڤيروس كاين الڤيستيارات. منطقي يستدو المسابح البلدية ولكن مسابح الاندية الخاصة ما مفهوماش.
الوالي سد مسابح طايتي وميامي وتروبيكانا واخا اوطيل ومولاها مضروب بفليطوكس عاجبو القرار. باش سولاتو كود" قال باللي ما كيجاوبش على الموضوع. تسد كذلك سان بيتش اللي الوالي عضو فيه ايامات كان باطرون فاطلنطا للتأمين.
اليوم تسد نادي اخر اللي هو الكاف. كلوب الصداقة الفرنسي فكازا. هاد النادي فيه شي 5 الاف منخرط وتفتح وفق مصدر "كود" بعد ما اتصلات عاملة عمالة الحي الحسني باللي مكلفين بيه وقالت ليهم يفتحو. اليوم تم اخبارهم من قبل الوالي شخصيا وفق شهادات ل"كود" باللي خاصهم يسدو.
مزيان السلطات فكازا تحافظ على صحة لمغاربة وطبق القانون ولكن خاص طريقة اخرى. ايلى شي بيسين ما حتارمش التباعد يعاقبوه ماديا ماشي يسدو ليه. راه الخاسر هي الدولة ماشي النادي ماشي الاعضاء. السي حميدوش واش عارف وضعية الدولة راك كنتي المدير العام لصندوق الضمان الاجتماعي.