واش بصاح تاصلات امينة ماء العينين برئيس الحكومة وببنكيران على قبل اختها؟ اللي تشدات مصدر ل"كود": ما كان حتى اتصال وبنكيران ل"كود": ما اتصل بي حد ومصدر من سلطات المدينة ل"كود": عارفينها مريضة

علمت "كود" ان التسجيل اللي فيه اخت امينة ماء العينين طلقات بعد اتهامها بخرق الحجر الصحي واللي كتقول فيه باللي اختها البرلمانية اتصلات برئيس الحكومة وببنكيران كولو غالط.
فهاد التسجيل كتقول اخت البرلمانية انها اتصلات بامينة وهاد الاخيرة اتصلات برئيس الحكومة الحالي وبنكيران باش طلقوها. هي كانت خارجة شافها مخزني ما دايراش كمامة. سولها سباتو وعايراتو. قدموها عند وكيل الملك فتيزنيت فين ساكنة. شافها طلقها. باش خرجات دارت هاد التسجيل
مصدر من سلطات تنزنيت اكد ل"كود" باللي كاع اللي فالتسجيل كذوب وباللي هاد السيدة عندها وضع صحي هو اللي كان سباب باش طلقوها وباللي ما كان حتى شي تدخل. شدد ل"كود" على انو حتى شي واحد فالسلطة ولا فالقضاء تلقى شي مكالمة من شي واحد
عبد الاله بنكيران حلف ل"كود" ما اتصل بيه شي حد. لا امينة لا غيرها. مقرب من رئيس الحكومة اكد ل"كود" انو ما اتصلاش بيه لا امينة ماء العينين لا غيرها. واضاف ما يمكنش للعثماني لا لغيرو يدخل فالقضاء وفهاد الوقت.
"كود" اطلعت على الملف الصحي للمعنية بالامر وللي كان سباب باش تطلق. يعني تسجيلها ماشي صحيح وهي معدورة