ها اللي وقع لي مع بوليس السيركيلاسيون اليوم فكازا. علاش البوليسي ما بغاش يتخلص مني فمخالفة ولاحني للكوميسارية

اليوم غادي نحكي ليكوم يا قراء “كود” اش وقع لي مع بوليس السيركيلاسيون فكازا. ما غاديش نقول ليكم شكون انا من غير اني بيضاوي اطار كنحترم القانون بزاف وديما باغي بلادي تتقدم ولا حصلت كنودي. كنخلص.
هاد اليوم الثلاث 3 ابريل 2018 ومع السبعة العشية كنت فالجيش الملكي بالدار البيضاء خارج من الخدمة فطونوبيلتي. الطريق عامرة. البوليس اللي كينظم السير نقول 5 نقول 6 خايضين مع الزحام ومدوخهم. شعل الضو لحمر فالوقت اللي صونا عندي التلفون. جاوبت بالضغط على اللعيبة الخضرا وديمارا لبلوتوت ديال الطونوبيلة. هاد الشي اللي وقع لي ماشي فشوش اولا حيت تقربيا كلشي عندو هاد التكنولوجيا. يالله گلنا آلو فالهواء حتا دق عليا بوليسي ما عرفتوش منين خرج. باين عليه معصب. انا نقدر خدمتو الله يحسن لعوان واخا بان لي خاصو غير معامن.
لمهم السلام. ارا لوراق. طبعا ما كاين لا تحية لا سيدي بوزكري ولا حتى نوع المخالفة. سولتو: مكاين باس. رد :عطيني لوراق. قلت لو: هاك أسيدي لوراق، راه كلشي اونغيگل.
تما زرب عليا بواحد الجملة: عندك 300 درهم: تخلص ولا ندي ليك البرمي. سولتو. الشريف اش نا هي نوع المخالفة بعدا. رد علي: راك عارف” وزاد “بلا ما تسخسخني معاك. شفتيني وخبيتي البورتابل”. رديت عليه “والشاف، راه الطموبيل فيها البلوتوت، كا جاوب بلا ما تشد التلفون”.
المهم مني منك وانا كنوريه لعيبة ديال كيفاش تقدر تجاوب وتهدر بلا ماتشد الجهاز، زادني تهمة اخرى، زرب علي وگال لي: آش كتدير؟ واش كتصورني؟ حيد التلفون من يديك.
قلت ليه “وا الشاف، نعل عوتاني الشيطان. واش ماعندي مايدار؟ وعلاش غادي نصورك”.
لمهم، مشا وخلاني كانتسنا فيه وكلشي كي كلاكسوني عليا فحال الى انا هو لي بغا يدير عرقلة السير… نزلت عندو ولقيتو كيكتب في بزاف ديال لوراق. قلت ليه: وا الشاف، اشنو درنا؟. رد علي : حيد من حدايا، كنيدير خدمتي.
گلت مع راسي الله يسلك الأمور مع هاد الاخ. باين خاصو غير معامن. وا هدا غير شاب، ماشي جيل زمان. ياكما كتروا عليه الخدمة. ماعليناش الطريق عامرة، و لومبوتياج. نتسناو ونشوفو باش غادي يتسالا هاد لفيلم. منها نيت تخوا الطريق شويا.
الفيلم هنا غي يبدا. جا عندي وعطاني لارط گريز، لاسورانس، ولافينيات. والبيرمي گال لي: سير خودو من الكوميسارية”.. صافي، بهاد البساطة. رديت عليه “ياك القانون كيكول نقدرو نخلصو المخالفة في عين المكان، مالك اشاف باغي دير معايا الشطط فاستعمال السلطة؟ رد علي “واسيمحمد راني في 12 شاهد، الله يعاونك”.
دابا جوج من لحوايج، ايما نبقاو نتلاجو وشد لي نقطع ليك وما عارفش فين غادي يوصل ولا نبدل ساعة باخرى ونخلي ليه البيرمي.
من هاد المنبر “كود” كنگول لهاد “الشاف”، راه المهنة اخلاق ماشي الشطط، ثانيا، سير دير شي بحث في گوگل على التكنولوجيا ديال البلوتوتوت لي داروها سيادنا الألمان غير باش ما يطيحوش مع شي بوليسي بحالك. و 300 درهم غادي نخلصها للدولة هنا وانت رفضتي ضد القانون ونزلتي علي الباطل.
عاودت قصتي ماشي باش نصفي حسابي مع هاد البوليسي. ابدا. بغيت باش ما تعاودش. تكون مخالفة وقادر المواطن اللي ارتكبها يخلصها علاش كيرفض الشرطي يتخلصها. علاش كيتصرف بحال ما تصرف معايا هاد البوليسي.
{{{
للاشارة وصافي. الصورة فالموضوع ماشي هي صورة البوليسي. غير تقريبية. حقاش بصاح ما صورتوش وما بغيتش واخا كنت نقدر ونشوهو ولكن اخلاقي ما تسمحش لي.