زلزال ماشي غير كروي فبرشلونة. بيكي: خاص كلشي يتبدل وانا اول واحد نمشي فحالي ايلى... ولابورطا كيطالب براس الرئيس والمدرب فهم راسو وها اللي غادي يعوضو

"ما لقيتش اش نقول. ما عمر الفرقة دارت هاد الشوهة. كنضحك باش ما نبكيش" هاد الشي اللي جاوب ليه واحد من مشجعي البارصا على هزيمة البارح. وحدين خراين تسناو الفرقة حدا لوطيل باش يخرجو الفقصة "ما حشمتوش".
هاد الزلزال اللي كتعيشو البارصا جا بعد الهزيمة التاريخية للنادي ضد بايرن ميونخ فربع دوري ابطال اوربا فلشبونة. لالمان ربحو ب8 لجوج. هزيمة اعتبرتها جريدة "اس" الرياضية الاسبانية "اهانة" ما قبلها اهانة٬ فيما ذهبت "سبورت" المقربة من الفرقة الكاتالانية انها "مذبحة تاريخية" للفرقة. فيما ذهبت "ماركا" المقربة من ريال مدريد الى اعتبارها "اهانة للتاريخ". الصحف الكاتالونية بحال "لافانگوارديا" كتبت "البايرين دفنات البارصا"
لاعب البارصا بيكي طلب بتغيير شامل وقال باللي هو اللول مستعد يمشي فحالو ايلى كان هاد الشي فصالح النادي. بيكي من غير انو ولد الفرقة راه كيمثل بزاف ليها. الاقليم اللي فيه كيطالب بالاستقلال ومن وجوهو هاد اللعاب اللي ما بقاش بغى يلعب من المنتخب الاسباني وبدا يلعب مع منتخب كاتالونيا اللي ما معتارفاش بيه الفيفا ولا الاتحاد الاوربي.
دابا كاين الضرب فكلشي. فاللعابة. شفنا الجمهور كيعاير. فالمدرب سيتيين اللي هو قال بلسانو سالى وقتو. دابا كاين جوجت المرشحين مدرب توتنهام السابق الايطالي بوكيتينو او اللعاب السابق للبارصا تشافي اللي كان رفض فوقت سابق تدريب النادي وفضل يبقى يدرب شي فرقة فقطر.
كاينة اصوات طالبات بعقد جمع عام استثنائي وتغيير الرئيس. الرئيس السابق للبارصا لابورطا حمل المسؤولية مباشرة للرئيس الحالي بارتومو. هاد الاخير وعد باحداث ثورة. طبعا ايلى خلاوه
فهاد المدينة الكورة ماشي كورة فقط. بل ورقة سياسية للاقليم للمطالبين بالانفصال. هزيمة بحال هادي قاصحة ماشي غير رياضيا حتى سياسيا