ماخرجاتش لاكارط ديال الفنان لرئيس جمعية الكاريكاتير فالمغرب وبزاف خرين.. الدهدوه ل"كود": مابقيتش بغيتها مازال والبطاقة ماشي هي اللي كتصنعني كفنان.. ورسامين: حشومة ماتخرجش البطاقة لنجوم الكاريكاتير فالمغرب

استغرو مجموعة من رواد فن الكاريكاتير كيفاش بزاف منهم ماخرجوش ليهم ليكارط ديال الفنان، بحال كيف كان وقع فالمرة اللي فاتت فاش ماخرجوش البطائق لحتى واحد فيهم.
هذ العام كاين اللي خرجاتش ليه لاكارط، وكاين اللي نساوه فخطرة وخا دفع الملف ديال الترشيح ديالو، ومنهم رئيس الجمعية المغربية لرسامي الكاريكاتير، عبد الغني الدهدوه، واحد من المحترفين فهذ المجال، اللي ساهم فتأسيس أول جمعية ديال ليكاريكاتيريست فالمغرب، واللي كتعتبر الوحيدة اللي كاينة لحد الآن.
فنانين الكاريكاتير استنكرو هذشي، فحديثهم ل"كود"، وعلى رأسهم الدهدوه اللي قال فتصريحو أنه ندم اللي دفع أصلا: "الكلام على هذ البطاقة أكبر منها بالنسبة لي، حيت الفنان لا تصنعه كارط كتعطى من الوزارة، وإلى كنت نتسنى البطاقة هي اللي تردني فنان وتعترف بيا فكنفضل منخدهاش أصلا، حيت ما يصنع هوية الفنان هو ميثاقه مع جمهوره".
وزاد الدهدوه كيقول: "انا بصراحة ندمت اللي دفعت وخجلت من نفسي، ودابا راجعت موقفي منها لأنها مجرد بطاقة وماغنعاودش ندفع ليها، وأنا أمتلك بطائق أخرى عديدة بحال بطاقة العضو في حركة "كارتون موفمنت" العالمية، بالإضافة لجمعيات ومنظمات أخرى".
من جهتو، قال الكاريكاتيريست محمد السعداني أنه استغرب علاش الدهدوه مخرجاتش ليه لاكارط، ولو أنه قديم جدا فالمجال ومن المحترفين والنجوم، "مامتيقش أنه هو وعدد من الأسماء ماحصلوش عليها هذ العام، خصوصا هو لأنه يشتغل في جريدة يومية منذ 12 لسنة، وينتج باستمرار وبشكل يومي تقريبا.."
وقال أنه هذي المرة الأولى اللي كياخدو فيها بعض رسامي الكاريكاتير لاكارط، من بعد لقاءهم بالوزير الأعرج سنة 2018 وإقناعه بضرورة وجود لاغيبغيك ديال هذ الفن ضمن قائمة الفنون اللي ممكن لماليها يحصلو على البطاقة، كيقول السعداني ل"كود": "لكن واخا هكذاك، ماخرجاتش لينا البطاقة هذ العام فالدفعات اللي فاتت، وحتى واحد فينا ماكان استفد منها، والآن دابا نفس السيناريو كيتكرر مع ألمع نجوم هذ الفن".
الكاريكاتيريست محمد الخو حتى هو استغرب هذ الإقصاء، وقال أنه خرجات ليه لاكارط ماشي كرسام كاريكاتير لكن كفنان تشكيلي "بزاف مننا ماخرجاتش ليهم، بصراحة ماعرفتش علاش، وأنا فهاذ الدفعة خرجات لي كفنان تشكيلي، لاني خريج المعهد الوطني للفنون الجميلة، وقانونيا أستحقها، لكن الزملاء ماخداوهاش وهذا مؤسف جدا وحشومة"، على حد تعبيرو ل" كود".
ومن غير الدهدوه، مجموعة من ليكاريكاتيريست ماخرجاتش ليهم، أمثال علي غامرد محمد الخزوم، ونزيهة البشير العلمي، وأسماء أخرى كتنتمي لجمعية رسامي الكاريكاتير، بالإضافة لأن فئة مهمة منهم فضلات ماتدفعش أصلا.
وكاين اللي كيرجح وكيقول أن عدم تمكين هذ ليكاريكاتيريست من بطائقهم راجع للرسومات التنديدية اللي كانو دارو فاش ماخرجاتش ليهم البطاقة فالدفعات اللي فاتو، واللي كانو استنكرو فيها إقصاءهم من طرف الوزارة بدون مبرر.
و"كود" حاولات تتصل مرارا بوزير الثقافة والشباب والرياضة، عثمان الفردوس، باش تسولو على سبب إقصاء هذ الرسامين من البطاقة، لكن تيليفونو صونا مرارا دون جواب، كيف حاولنا الاتصال بالمكلفة بالتواصل، وماتلقينا حتى جواب.