الكاريكاتيريست المغاربة كاعيين.. حتى واحد فيهم ما خرجاتلو لاكارط ديال الفنان لسنة 2020

مجموعة من الكاريكاتيريست المغاربة كعاو بزاف حيث ماحصلوش على لاكارط ديال الفنان برسم سنة 2020.
وعبرو الكاريكاتيريست على الغضب ديالهم على موقع التواصل الاجتماعي “فيسبوك”، ونشروا مجموعة من الرسومات باش يحتجوا حيث ماخداوش لاكارط الرسمية اللي كتعطيها وزارة الثقافة.
وحط عبد الغني الدهدوه، رئيس الجمعية المغربية لرسامي الكاريكاتير، رسمة عبر فيها على استياؤوا بسبب عدم حصول الكاريكاتيريست المغاربة على البطاقة، واللي رسم فيها وزير الثقافة والشباب والرياضة حسن عبيابة لابس جلابة وواقف فوسط كَرياج ديال الحديد وحال رجليه، وكيقول للرسامين يجيو ياخدو لاكارط من تحت رجليه، لكن قلم الرصاص، واللي هو رمز لهذ الفن، قاليه “ما بغيتهاش”.
الدهدوه نشر بالإضافة لهذ العمل الساخر تدوينة على “فيسبوك”، قال فيها بللي ندم بزاف لأنه دخل مكاتب الوزارة وحط فيها طلب الحصول على البطاقة، وقال بللي المسؤولين كاع مكايقدرو الفنان المغربي باش يعطيوه لاكارط، وعمرو يعاود يحط طلب آخر و”آخر مرة تشوفو وجهي هذي والتوبة”، حسب تعبيرو،
من جهتو، حط رسام الكاريكاتير المشهور خالد كَدار حتى هو رسم ساخر احتجاجا على عدم منح الكاريكاتيريست المغاربة لاكارط، كيصور لوائح الدفعة الأولى والثانية فخلفية الصورة، وفمقدمتها الصبع الوسطاني مقلز.
وحتى محمد الخو عبر على الغضب ديالو برسم دار فيه ملفات الكاريكاتيريست محطوطين فالطواليط، وواحد الشخص مجهول كالس فيه شد واحد من هذ الملفات باش يمسح بيه مؤخرتو.
ورسام الكاريكاتير الخو قال فتدوينة على صفحتو الفيسبوكية “لا وجود لاسم كاريكاتيريست واحد ضمن لوائح الحاصلين على بطاقة الفنان”، ورفقها بهاشتاكَ “#فنان_بلابطاقة” اللي استعملوه كَاع الكاريكاتيريست.
وبعدما تبين لأعضاء جمعية رسامي الكاريكاتير أن حتى واحد منهم ما حصل فعلا على لاكارط، كايفكرو إصدار بلاغ حول الموضوع، للتنديد بهذشي.