القضاء انتاصر للتلاميذ ضد لهطة المدارس البريفي.. المحكمة فبنكَرير لزمات مدرسة تعطي شهادة المغادرة لتلميذ

لزمات المحكمة الابتدائية فبنكَرير على مدرسة خصوصية باش تسلم شهادة المغادرة لتلميذ باش يمشي يتقيد فمدرة خرى، بعدما كانت رفضات تعطيهالو قبل باش يبقى كيقرى فيها حتى فالموسم الدراسي الحالي.
وصدرات ابتدائية بنكَرير حكم استعجالي باش المؤسسة تعطي شهادة المغادرة للتلميذ والنتيجة ديالو، وإلى مابغاتش فغيمكن للتلميذ يتسجل فأي مدرة أخرى واخا هكذاك، وحكمات عليها بغرامة ديال 500 درهم على كل يوم تأخير.
واعتبرات المحكمة، فالحكم ديالها، أن حق التعليم كتكفلو المادة 31 من الدستور، والدولة ملتزمة بتعبئة كَاع الوسائل المتاحة لتيسير أسباب استفادة المواطنين من الحق فالتعليم، وعلى قدم المساواة.
وتدخلات المحكمة بشكل مستعجل لان التلميذ مغيكونش عندو الحق يتقيد فحتى شي مدرسة أخرى إلى ما حصلش على شهادة المغادرة من المؤسسة اللي كان مسجل فيها قبل.
وكان سبق لوالي امر التلميذ تقدم بمقال استعجالي لرئيس المحكمة الابتدائية فبنكَرير، ف21 فهذ الشهر، كيلتمس منو التدخل باش تسلم المدرسة البريفي للدري شهادة المغادرة، باش مايضيعش حقو فالتعليم.