بعد عرض فيلم "القلب الغارق" ف إم بي سي 5 قضية الممثلة لهويتر والمخرج لحكيمي رجعات للواجهة: تاهماتو بللي قصاها من التورناج وكلا ليها رزقها.. ومصدر ل"كود": هي اللي مابغاتش تكمل حيت بغات تخلص قبل الوقت وجميع الممثلين صبرو معاه

عبرات الممثلة فاطمة الزهراء لهويتر، فتدوينة ليها ف"فيسبوك" على استغرابها من عرض فيلم "القلب الغارق" فقناة MBC5، باعتبار أنه مازال ماخلصوهاش على خدمتها فيه لمدة 4 سيمانات، والمخرج، فريد لحكيمي، ماعيطلهاش فالكمالة دالفيلم وحيد ليها دور البطولة واستغنى عليها نهائيا واخا كان عندها ديسين مهمين فهذ الجزء، وهي عوالة دابا تحط شكاية ثانية للمركز السينمائي المغربي ضد مخرج الفيلم وشركة الإنتاج ديالو.
مصدر من فريق الفيلم نفى ل"كود" هذ الهضرة، وقال بللي الفيلم كمل بلا بيها ماشي حيت ماعيطوش ليها، لكن حيت هي رفضات تكمل التصوير إلى ماتخلصاتش، كيقول : "كاين شي حوايج عندها الحق، إيه هي فعلا مازال ماتخلصات، لكن هذشي وقع حيت ماكملاتش التورناج حتى بقات عليه 3 أيام، كانت بغات تتخلص قبل، والمخرج، كان كلا العصا مزيان ومكانش عندو باش يعطيها".
المصدر نفسو وصف هذ القضية ب"العصا فالرويضة"، و"المخرج كانو عندو مشاكل ديال الدعم، ومنين رفضات تكمل حبس التصوير، أما التقنيين فكملو هذاك الأسبوع واخا ماخداو حتى فرانك، ولحد الساعة مازال ماتخلصو حيت المخرج مازال ما خدا جوج أجزاء اللخرى ديال الدعم من المركز السنيمائي"، على حساب هضرتو.
وكشف بللي المخرج لقا صعوبة فلاروبريز ديال الطورناج والجمع دليكيب كاملة، وكمل الفيلم ودار مونتاج آخر وحوايج خرين، واضطر يزوليها الدور الرئيسي ومايديرهاش فلابوند دانونص، "لكن فنظري، من أخلاقيات مهنة التمثيل يتكمل التصوار، ماعمرنا نقولو عطيني فلوسي عاد نكمل معاك التصوار، حيت كاين كونطرا، وإلى ماتخلصش الإنسان كاين القانون".
من جهتها وضحات لهويتر اش وقع ليها، وقالت، فتصريحها ل"كود"، بللي الفيلم بدا التصوير ديالو ف2014 ، وهيا كانت واخدة فيه دور البطولة، لكن من بعد 4 سيمانات التقنيين بداو يجمعو الماطيريال ديالهم حيت ماتخلصوش، كتقول: "هو كان من المقرر فالسيمانة الخامسة تتصور أهم الأجزاء اللي داير عليها الفيلم، واللي كنمثل فيها أنا بشكل كبير، ماتصوروش، وأنا مكتوب عندي فالكونطرا بللي غيخلصوني حتى للخر ديال الطورناج، وعمر هذ اللخر ما وصل".
وأكدات لهويتر بللي كَاع ماكان فراسها أن المخرج كمل التصوير بلا بيها ومابقاش عندها الدور الرئيسي، وخرجات لابوند دانونس ديال الفيلم، ماعرفتش فوقاش كمل وكيفاش كملو داكشي اللي بقا ناقص، حتى كنتفاجأ بانه تباع لMBC5 وداز شحال من مرة.
وكشفات هويتر بللي مخرج الفيلم عندو مشاكل مع المركز السينمائي، حيت خدا الدعم وباقي ما كمل خدمتو، وماعرفاتش واش القناة فراسها هذشي "وأنا كممثلة خدات الدور الأول مافخباريش وعطيتي مجهودك ووقتك وبزاف دالحاجات، ماكاتسيق خبار.
وأكدات أنها كانت حطات شكاية للمركز السينمائي ف2014 فاش ماتخلصاتش مع تقنيين وناس خرين حتى هوما ماتخلصوش، ومابغاش يعطيهم المخرج شثك كضمانة، ودابا عوالة تحط شكاية جديدة خرى.