نايضة روينة فبلدية الحسيمة بسبب "ميزانية مزورة".. وعضو فالمعارضة ل"كود": احتجينا وامتنعنا على التصويت حيت لقينا تزوير وتضارب فالأرقام وتبدير وهذشي ماشي معقول

امتنع فريق العدالة والتنمية وحزب العهد الديمقراطي، اللي كيسكلو المعارضة فبلدية الحسيم، على التصويت على جدول أعمال أول جلسات دورة أكتوبر فالجلسة داليوم الأربعاء، وهزو لافتات أكدو من خلالها أن مشروع ميزانية 2021 كيتضمن مجموعة من النقاط اللي تم "تزويرها"، حسب التعبير ديالهم.
وفتوضيحو لشنو جرا فجلسة اليوم الأربعاء، قال فؤاد بنعلي، رئيس فريق حزب العهد الديمقراطي، أن الميزانية اللي تطرحات تاسسات على مجموعة من الوثائق اللي كتضمن أرقام غير حقيقية، بحكم أنها مكتتوافقش مع أرقام كانت تذكرات العام اللي فات، والتفاوت فالأرقام كلشي فالمعارضة لاحظو واستغربو ليه.
وزاد بنعلي، فتصريحو ل"كود"، أن أغلب الوثائق اللي تحطات غير مؤشر عليها ومكتحتوي على حتى شي ختم ديال الخازن او الآمر بالصرف، وممكن أي واحد يكتبها ولا يمكن اعتمادها.
وبالنسبة للأحكام القضائية اللي صدرات من أجل التعويض، قال بنعلي أن الورقة اللي تعطات للجنة المالية ماشي هي اللي تعطات للأعضاء، بحيث الورقتين بجوج كيحتويو على نفس الجدول لكن مضمون الجداول مختلف، وبجوج فيهم الكاشي دالجماعة، وبالتالي حتى هذا تزوير، وكان رئيس اللجنة اعترف ضمنيا أن فيها أرقام وأخطاء غير حقيقية.
أما اتفاقيات الشراكة، قال المتحدث نفسه أنه تمت دراسة مجموعة من الشراكات اللي واصلة تقريبا فالمجموع ل500 مليون، واعتبر أن هذشي فيه تبدير للنفقات، وماكايناش الريحة ديال ترشيد نفقات وزارة الداخلية كيف كانو قالو، والليخحاصها نورمالمون تعتمد بسبب الأزمة الاقتصادية اللي تسببات فيها جايحة فيروس كورونا المستجد.
وقال أن هذ الشراكات ماعند المعارضة والمواطنين حتى خبار عليها، وماكاين حتى معطى عليها، وبغاو يناقشوها شفويا، وهذشي مايمكنش كيف قال، "ماعارفينش حتى فوقاش دارو الاعلان، وماكاينش مبدا المساواة، وخاص يوضحو عل هذ الشراكة خدات هذ القدر ولخرى لا"، على حساب كلامو.
ومن جهة خرى، استنكر بنعلي كيفاش تكون الجلسة مغلقة ومايحضروش ليها الناس والصحافة، ومايتدارش ليها حتى المباشر، واخا كاين موقع رسمي دالجماعة.
وقال أن المعارضة كلها امتنعات على التصويت، وحتى فريق النهضة انسحب، "حيت لا يمكن نصوتو لا مع لا ضد، حيت مايمكنش ناقشو معطيات لا تتساوى مع مراسيم الميزانية، لكن الأغلبية المنتمية لحزب الأصالة والمعاصرة صوتو ومررو داكشي"، كيف قال.
و"كود" حاولات تتصل برئيس بلدية الحسيمة، محمد بودرة، باش تاخد إفادتو فالموضوع، لكن تيليفونو مطفي.