أش خلاو للناس مايديرو.. فاطما الزهرا العروسي خرقات إجراءات كورونا واحتافلات بعيد ميلاد بنتها بحضور مشاهير بلا تباعد وشي لاصق فشي -فيديو

بزاف ديال المشاهير لي من المفروض يدوزو ميساجات ايجابية ويكونو قدوة في احترام الاجراءات لي فارضاها السلطات لمواجهة جايحة كورونا، كتلقاهم هوما الأولين خارقين هاد القوانين وزايدين موثقين هادشي في اللايفات والفيديوهات.
أسباب هاد الهضرة، المغنية فاطمة الزهراء العروسي لي دارت عيد ميلاد لبنتها وجمعات فيه بزاف ديال الناس، ومامانو محتارمين لا تباعد، لا مسافة الأمان، لا لابسين كمامة، كان غير التعناق والبوسان.
في الضيوف، كانو حاضرين المنشطة سناء القدميري وحياة زروكَة ولمياء الزايدي وربيع صقلي وفاطما الزهرا قنبوع وعبير عابد، ولاليست طويلة، الحاجة الوحيدة لي داروها مزيانة هي طفاو الشمع بيديهم باش مينفخوش عليهم.
هاد السميات منهم لي كيقدم راسو كمؤثر وعندو الآلاف ديال المتتبعين في مواقع التواصل الاجتماعي، ومنهم لي فنانة ومعروفين، وفي هاد الحالة مخلاو لنبادم ميقول.