من 60 ألف ريال حتى ل11 مليون.. ثمن العمليات اللي كيديرو المغربيات على تراميهم وكرشهم وقنانفهم وحتى الرجال المغاربة كيخلصو فلوس صحيحة باش يحيدو البزازل ويطراسيو ليزابدو

الروبرتاج لي دوزات tf1 البارح على عمليات التجميل في كازا كشفات فيه على ثمن ديال العمليات لي كيلقاو اقبال كبير بزاف من عند المغربيات ولي كتبدا من 3 الاف درهم حتا ل4 مليون.
الطبيب لي خرج فورمة سماها "فيراري" كيديرها بربعة المليون ولي اساسا كيحيد فيها الكرش وشحمة وكيدخل الجناب وديك شحمة لي كتحيد كيعمرها في ترمة والفخاض والثمن هو 4 مليون سنتيم. وحسب الروبرتاج كيدير ما بين 3 حتال 5 في سيمانة يعني كيصور واحد 20 مليون في سبعيام و80 مليون في شهر.
الطبيب الكَزار لي نهار ومطال وهو يحط فيديوهات العمليات بطريقة بشعة كيدير حتى عمليات كيبدل فيهم ستيل ديال العين ولي كيهز الحاجب وكتولي العين بحال الثعلب وهادشي بمليون سنتيم.
التجميل لي كيبقا ثمنو قليل هو داكشي ديال الفيلر في الفم والبوتوكس في جبهة. وفي البرنامج صورو مع انفليونسور لي قالت انها كتخلص 60 الفريال وكدير ليه الاشهار في انستكَرام.
طبيب لي سلطات عليه القناة الفرنسية الاضواء، عبر برنماج sept à huit، ماتت عندو مؤخرا درية ملي بغات دير عملية تجميل وعائلتها لحد الان مازال باغين حقهم خصوصا انه بغا ينكرهم وهزها من كلينيك ديالو وبغا يديها لكلينيك اخر على حسب ما قالو العائلة في تصريحات صحافية قديمة.
طبيب ثاني دوات عليه القناة كيدير عمليات التجميل للرجال وكيحيد ليهم الكرش والشحمة وحتى البزازل لي مدلين والثمن هو 11 مليون سنتيم وعطاو المثال بمغربي جاي من الخارج دار عملية تجميل باش يرجع الثقة في راسو ويبانو عندو ليزابدو مطراسين.