رمضان وكونفينمون (الحلقة 20).. غيثة لكَزولي فحوار مع "كود": الدعوى ضد "قهوة نص نص" مامنهاش حيت كَاع المهن فيها الصالح والطالح

"كود" سولات مشاهير وسياسيين وفنانين ومؤثرين وإعلاميين على كيفاش كيدوزو نهارهم فهذ رمضان الاستثنائي مع كورونا، وعلى رايهم فالإنتاجات الرمضانية.
واليوم حاورات "كود" الممثلة غيثة لكَزولي، اللي قالت أنها ولفات الحجر الصحي، وكتمنى شخصية "نجمة" اللي مثلاتها ف"الماضي لا يموت" تعجب المغاربة.
كيفاش كتدوزي رمضان دابا اللي مسدود علينا؟
عادي بحال العام اللي فات، العام اللي فات اللي كانت القضية شوية صعيبة، اما دابا ولفنا، الحمد لله كاينة اللمة، أهم حاجة هي تجمع مع عائلتك فرمضان، يعني ماشي شي فرق كبير بين هذ رمضان ورمضان دالعام اللي فات.
كيجاوك أعمال رمضان؟
تفرجت فمجموعة من الأعمال، شوية شوية من كلشي، ولكن اللي متبعاه كثر هو مسلسل "الماضي لا يموت" فالجزء الثاني ديالو، وكذلك مسلسل "بنات العساس"، عجبوني بزاف حيت شفت فيهم تطور كبير فالدراما المغربية، وهذ القضية كتشرف وتفرح أي مغربي، وخصوصا الممثلين، حيت كنلاحظو انه بحال إلى ولات عندنا منافسة داخلية، دابا الحمد لله كاينين اعمال مشرفة فيها مجهود وطاقات كبيرة ومنتوج فني نفتخر به كفنانة وكمغاربة.
شنو رأيك فدعوى محامين ضد إنتاج تلفزي اعتبروه "كيسيء للمهنة"؟
كنحترم جميع المهن، حيت جميعها مشاركة فتكوين المجتمع، بحيث كل واحد فينا كيكمل الآخر، وماكنشوفش لاش الواحد يشخصن بيرسوناج فشي عمل، ويدير الإسقاط على راسو ويقول أن فيه إهانة لهذ المهنة، لا أعتقد، انا كنشوف هذاك عمل فني فيه إبداع، بعض المرات كيكون من وحي الكاتب أو السيناريست أو المخرج، فماعندوش لاش الواحد ياخدها بطريقة شخصية، وجميع المهن فيها فئة ممكن تكون مازويناش، بحيت البشر فيه الصالح والطالح، ومايمكنش تكون شي حاجة مثالية.
شنو الجديد ديالك بعد "ياقوت وعنبر"؟
الجديد ديالي كانت حلقة من برنامج "مداولة"، راها دازت على القناة الأولى، وكذلك دور نجمة فمسلسل "الماضي لا يموت" فالجزء الثاني.
كيفاش كانت تجربتك ف"الماضي لا يموت"؟
هذ الدور ديال "نجمة" مختلف بزاف على "غيثة التاج" ف"ياقوت وعنبر"، وفيه إحساس كبير وتجربة مختلفة، فيه كذلك مجهود جسدي ونفسي، وكنتمنى إن شاء الله يوصل للجمهور المغربي كيف عجبهم دور "غيثة التاج".