رمضان وكونفينمون (الحلقة 11).. سعيد موسكير فحوار مع "كود": الدولة خايفة على صحتنا لكن كاينين اللي تضررو من الحجر فالليل.. وبغيتي تفطر فطر فداركم ماغيحبسك حد

"كود" سولات مشاهير وسياسيين وفنانين ومؤثرين وإعلاميين، على كيفاش كيدوزو نهارهم فهذ الرمضان الاستثنائي مع كورونا، وعلى رأيهم فقرارت خداتها الحكومة.
الفنان سعيد موسكير كان من المحاورين، وها آش عاود ل"كود":
كيفاش كتدوز رمضان دابا اللي مسدود علينا؟
كنفطرو ومانخرجوش، كنبقاو فديورنا ونصليو فديورنا، وأنا وليت نشد النوبة فاغسيل الماعن مع مراتي، وكنبقى فالدار بزز مني، ونتبعو الحلقات ديال المسلسلات وشنو واقع فالتلفزة باش يدوز الوقت.
واش الإجراء اللي اتخذاتو الحكومة مزيان؟
بهذ القرار بينو أنهم خايفين علينا، ولكن واش يخافو علينا غير بالليل؟ وفالنهار الناس خارجين والطوبيسات والمساجد عامرين، وعاد كاين اللي كيتمعشو غير بالليل فرمضان، بحال القهاوي وغيرها، ولكن الله يجازيهم بيخير بهذ القرار إلى خايفين على صحة المواطن، بالحق كنظن من الأفضل يسرحونا شوية يخليوها حتى ل11 ديال الليل باش الناس يتروجو، واخا يديروها غير ف10 أيام اللخرة ديال رمضان.
شنو رأيك فمنع التراويح؟
رجع لينا الحنين لصلاة التراويح فالمساجد وصوت الامام والقرآن، ولكن ماشي مشكل، كيمكن للناس تصلي فالدار، انا هذي عامين كنصلي بعائلتي ولومبيونس كتكون زوينة، ومادام الحكومة دارت هذ القرار خاص نتقيدو بيه، والناس اللي كيخرجو يحتجو من حقهم غير خاص الاحتجاج يكون فإطار القانون، وحنا الحمد لله دولة ديمقراطية، ومابغيناش الفوضى.
كاين اللي باغي يفطر بالعلالي، نت معاهم ولا ضدهم؟
هذي ماشي حرية هذي ضصارة، بغيتي تفطر فطر فداركم ماغيحبسك حد، لاش غاتخرج تفطر قدامي وانا صايم؟ كول وتاحد مايقليك شي حاجة داكشي بينك وبين الله، لذلك كيخص يكون الاحترام، سبقلي خدمت فاوروبا مع نصارى وفرمضان ماكيقدوش ياكلو قدامي حيت انا صايم، هذشي كينطبق حتى على المدير اللي كان كياكل او كيكمي أو كيشرب قهوة بعيد عليك، احتراما ليك وللديانة ديالك.
كيجاوك مسلسلات رمضان؟
كنتفرجو فيهم، كيجيو مع الحريرة والشباكية فمايمكنش مانشوفوهمش، وحنا تعودنا على هذشي كل رمضان، بحال الى ساحرين لينا، القنوات كاينة بالآلاف والمغاربة كيفضلو القنوات ديالهم مع الفطور، وانا إنتاجاتنا شخصيا كيعجبوني، ودابا وصلنا لمرحلة ولاو القصص زوينين والسيناريو فالمستوى والتصوير واعر والأداء مزيان، 80 فالمية مزيانين، وديما القنوات المغربية كتحقق نسبة عالية ديال لوديونس فرمضان مع الفطور.
هضر لينا على الجديد ديالك؟
كنشتغل فشركة البروديكسيون "موسكير إيفانت"، وولينا نشدو الإشهار، وكنتلقاو عروض بزاف فهذ الباب، اما على المستوى الفني كنحضر لجوج كليبات، وكاينين اغاني كيخرجو شوية بشوية، صحيح أني غبرت لكن موجود وغيكون قريبا الجديد ديالي.