الجزائر كتعاني من ازمة الما... كيتقطع على أحياء العاصمة لمدة طويلة وأكبر السدود فالبلاد نشفات والدزايريين كيحتجو

الجزائر كتعرف ازمة ديال الما الصالح للشرب، وخصوصا فالعاصمة اللي مقطوع عليهم الما فبعض الأحياء لأكثر من ثلاث أيام، الشي اللي خلا مواطنين كثار يخرجو للاحتجاج.
الخميس اللي فات، سكان منطقة باب الزوار قطعو مؤقتا الطريق اللي كتدي لمطار الجزائر الدولي، وكيتعلق الأم تحديدا بساكنة حي المصلحة الوطنية اللي تحبس عليهم الما لمدة طويلة.
وحسبهم، 3 أيام وماهبطات ولو نقطة وحدة من الروبينيات، وبقاو هكذاك حابسين الطريق حتى نزلو عندهم المسؤولين المحليين وواعدوهم يعاود يتطلق الما مع 8 ديال العشية.
هذشي وقع حتى فمناطق خرى، بحال فبرج الكيفان اللي حتجو فيه الناس جوج ليلات متتالية على نفس المشكل، وفمنطقة ريغاية تم الإبلاغ على ازمة حادة ديال الما، الناس فهذ الحي ناضو فنص الليل يعمرو الريزيرف ديال الما، فاش رجع ليهم، مخافة يعاود يتقطع.
وكانت علنات ولاية الجزائر العاصمة على قرار تقليص نشاط سطاسيونات اللافاج ديال الطوموبيلات بشكل مؤقت، بخيث هذ النشاط كيستهلك بزاف ديال الما، والحل هو تحل هذ المحطات 4 أيام فالسيمانة، فالجمعة والسبت، والاثنين والأربعاء.
وكان علن الوالي على جدولة جديدة لتزويد العاصمة بالما، بحيث غتحصل 14 بلدية على الما من 8 ديال الصباح ل2 ديال الظهور، و20 خرى من 8 حتى ل4، و23 خرين حتى هوما من 8 حتى ل2، وشي لي بقى من 8 ديال الصباح حتى ل8 ديال العشية، وهذشي كل يوماين. وواعد الوالي أن هذ الوضع مؤقت، وواعد بحلول من قبيل إنشاء محطات تحلية وبيار جديدة.
وهذشي درتو قلة التساقطات فالجزائر هذ السنوات الأخيرة، الشي اللي أدى لانخفاض معدل ملء السدود، بحيث كانت ذكرات صحيفة الوطن فتقرير ليها ان ثاني أكبر مساحة لتخزين المياه فالبلاد، واللي جات فولاية البويرة، وكتبلغ 640 مليون متر مكعب، ناشفة تماما، وحتى سد تيزي وزو اللي كيهز 180 ملون متر مكعب، حتى هو ناشف تقريبا.
باقي التفاصيل هنا:
https://www.tsa-algerie.com/la-crise-de-leau-prend-des-proportions-inquietantes-a-alger/