الشينوا حققات انتصار كبير.. تغلبات على “كورونا” و70 فالمية من المصابين تشافاو والصبيطارات الميدانية سدو

الشينوا سيطرات على فيروس “كورونا” المستجد ديال بصح، اليوم علنات بللي 61 ألف و644 حالة تشافاو منو بشكل نهائي، بمعنى حوالي 70 فالمية من عدد المصابين الإجمالي، بينما غير 15 ألف و980 حالة كتتلقى العلاج، وغير 3 آلاف و169 حالة فقط اللي توفات.
ولبارح الخميس سجلات الشينوا 8 ديال الحالات دالإصابة بالفيروس كلها فإقليم هوباي اللي بان فيه الفيروس أول مرة، وهو أقل رقم تسجلو الشينوا ديال الإصابات منهار بدات هذ الأزمة فاللخر ديال شهر يناير، وغير الأربعاء سجلات 11 لإصابة وحتى هو رقم قليل.
وبالنسبة للوفيات، تسجلات لبارح 17 وفاة جديدة فالشينوا كاملة، كلها كانت فمقاطعة هوبي، و16 منها تحديدا فمدينة ووهان، وهذ العدد هو أقل عدد ديال الوفيات من اللخر ديال يناير.
وفتصريح رسمي ليه قال مي فنكَ، المتحدث باسم لجنة الصحة الوطنية فالشينوا، بللي تجاوزو بشكل عام ذروة الوباء، وعادت الأمور لوضعها الطبيعي بعدما انخفضات أعداد الإصابات والوفيات بشكل كبير.
وأغلب الناس اللي ولاو يكتشفو إصابتهم بالفيروس فالشينوا كيكونو جاو من برا وجابوه معاهوم، وهذشي من بعد ما تخففات قيود السفر شوية هذ الأسبوع، واستانفو الشركات الخدمة من جديد.
واستطعات الشينوا تتغلب على الفيروس رغم خطورته وسرعة انتشاره بسباب الإجراءات الصحية والأمنية المشددة اللي عرفاتها مدينة ووهان تشهدها والمناطق المحيطة بها في مقاطعة هوباي.
وغلقات الشينوا 14 صبيطار ميداني كان مخصص للاحتفاظ بمرضى “كورونا” فالحجر الصحي، وهذشي بعدما براو وستعدو عافيتهم، وكذلك سدات السبيطار الكبير فووهان اللي كانت بنات ف10 أيام باش تعالج المصابين بالفيروس، ونظفاتو وعقماتو.
ولكن واخا الشينوا تغلبات على “كورونا”، دابا دول خرى حصلات معاه، بحال الدول الأوروبية بحال إسبانيا وفرانسا وبلجيكا، وخصوصا إيطاليا اللي أعداد الإصابات والوفيات “بكورونا” فيها كيتزاد عندهم بالعشرات والمئات كل نهار، وهي عاجزة على إيقاف هذ النزيف.