واش الرحلات غايتلغاو عاوتاني مع الاصابات اللي طالعين بزاف.. مسؤول فالمكتب الوطني للمطارات ل"كود": حتى حاجة دابا ما رسمية والناس بزاف كتدخل وتخرج

من بعد قرار الحكومة بسدان الريسطورات والقهاوي مع 9، وإغلاق الحمامات وقاعات الرياضة ولابيسينات المغلقة، ومنع التجمعات اللي كتفوت 25 شخص حتى فالأماكن المفتوحة، بدات كتروج تاني أخبار على إعادة إغلاق الحدود وإلغاء الرحلات من وإلى المغرب من جديد.
وتداولو نشطاء على مواقع التواصل الاجتماعي تكهنات وفرضيات بإغلاق الحدود فغشت الحالي نيت، الشيء اللي خلف الكثير من القلق فصفوف مغاربة العالم اللي مدوزين العطلة ديالهم فالمغرب، ومابقاوش عارفين لشنو غتؤول الأوضاع، بعد الارتفاع الملحوظ فالعدد اليومي للمصابين بكورونا اللي بدا يقترب من 10 آلاف إصابة فاليوم الواحد.
مسؤول فالمكتب الوطني للمطارات اعتبر ان بحال هذشي مجرد هضرة على مواقع التواصل الاجتماعي، ولحد الساعة ما كاينة حتى شي حاجة رسمية.
وزاد المسؤول، فتصريحو ل"كود"، أن المطارات خدامين بلا مشاكل، والناس كيمشيو ويجيو بالشروط اللي كاينين.
ولكن مانفاش يكونو مفاجآت، "حسب تجربتنا حنا كاملين مع كورونا راه قرارات بحال هكذا عا تا كيجيو، وحتى شي حد ما كيكون معول عليهم، ولكن لحد الساعة ماكاين والو"، حسب تعبيرو.