الأمل الوحيد لي عند سكان فاس حاليا باش أنها تتطور وتلتاحق بمدن بحال بنگرير وطنجة والرباط هو إقامة الملك فيها أما الانتخابات مكاين حتى شي مؤشر أنها غادي تحسن جودة حياة الناس

الأمل الوحيد لي عند سكان فاس حاليا باش أنها تتطور و تلتاحق بمدن بحال بنگرير هو إقامة الملك فيها، هاد المدة لي دوزها الملك في فاس خلات ناس تفرح وتطمأن لمصير هاد المدينة وتشوف الخير جاي لقدام، منذ إقامة الملك في فاس راه تزاد الامن في المدينة بشكل كبير، بعض المقاطع الطرقية تصلحات ولو بشكل محتشم، بين القصر ديال المدينة والفيرمة ديال الضويات الطريق تنقات وتقاد الگازو والورد جنبها، المهم أخيرا سكان فاس حسو براسهم مابقاوش منسيين ومهملين هوما ومدينتهم كيف كانوا، بالاظافة الى المشاريع لي غادا تبدى في هاد المدينة ابتداء من المنطقة الصناعية ديال عين الشكاك مرورا بمشاريع اقتصادية كثيرة أخرى غادي تكون مستقبلا، هادشي كامل وقع من بعد الإقامة ديال الملك فيها .
وفي المقابل بخصوص الانتخابات حتى واحد مكيتسنى منها الخير، الانتخابات مانفعاتش فاس عشرات السنين هادي كيفاش غادي تنفعها ديال هاد المرة بالظبط، الرباط مثلا ديما كتسمع هادي دائرة الموت هادي قاعة انتخابية للحزب الفلان فلاني، كتلقى أمناء عاميين ديال الأحزاب مرشحين في نفس الدائرة، كاين مواد صحفية واخبار ديال مرشحين مختالفين وكثار، هنا في فاس ملي تفيق حتى تنعس كاين الهدرة غير على شباط المرشح الوحيد والاوحد لي قدرات تخرجوا فاس في تلاتين عام اللخرة، في موقع كود نيت راه كل نهار تلقى مادة او جوج عليه، شباط رشح مرتو وبنتو، شباط دار تجمع واخا كورونا، شباط مشا للحركة، شباط مابقاش مشا للسبولة ودار عند الزيتونة، حتى ملي كان خاوي فاس كانت الهدرة عليه، نمشي عند الحلاق يهدر عليه كيفاش وقتوا كانت حسن بالنسبة للحلاق وللخضار ولمالين الشوايات في بنسودة، وللسويقة ديال عين السمن، وللمقاولين العقاريين وللطاشرونات فولاد الطيب.
انا دابا جايا تلات سنوات وأنا ساكن في فاس، وزعمة راني انسان متبع الصحافة والفايسبوك والصفحات المحلية عمري سمعت على شي مرشح من غير شباط واليازامي كنسمع عليه غير السبان والمعيور والدعاوي، وهاد الانتخابات اول مرة نتسجل في حياتي وناوي نصوت وليوم بدات الحملة، ومع ذلك مكنعرف حتى شي مرشح آخر من غير شباط، وماقريت حتى شي مادة على شي مرشح او خبار كيما كان سلبي أو إيجابي المهم غير يلفت النظر، وا والو بحال الى شباط مرشح بوحدو.
الناس باغين غير مدينتهم تقاد وتروج القضية وتستافد حتى هي من التنمية بحال المدن الأخرى، يطلع شباط ولا شارون ولا أي واحد، االمهم هو المدينة تصلح وتتطور ويوليو فيها مرافق تليق بحجم وتاريخ هاد المدينة، أولها مسابح بلدية ماشي غير مسبح واحد لأنه ماقادش، دابا الرباط مدينة مستفة كلها على البحر حداها اجمل الشواطئ ومع ذلك فيها اكبر مسبح في افريقيا وغير بعشرة دراهم واخا الخرارة فيها مكافوتش تلاتين، فاس الحرارة وصلات لسبعة وربعين والى بغيتي تعوم في الرخى ماعليك إلى بواد فاس تعوم فبوخرارو او تمشي لصفرو ولا مكناس باش تعوم، عيب هادشي، ولي عيب كثر هو كيفاش مكيبان حتى شي واحد عندو الغيرة على هاد المدينة وناوي بصح يغير ويصلح بلا داك الهدرة ديال كياكل ويوكل حيت هاديك هي لي خرجات على المدينة وخرباتها ورداتها عروبية كبيرة، كياكل ويوكل كتعني كيشفر ويخلي لخريين يشفرو.