كود" تنفرد بنشر مذكرات محمد سقراط الحلقة 69: لهويدي دوز 25 عام وغادي يبقى حتى 2014 كنبقى نتخايل باش يخرج ويشد ايفون 11 ولا يتفرج فافاتار 3 دي راه يقدر دماغو يسكت، السيد خلا التلفازة قد الماريو

سمر، ضعيف، وشيباني، وفيه أثار صحة قديمة، مكيهدرش بزاف، وديما هاز معاه كاس ديال الدكة، النهار كلو وهو كينفر، قليل فين تشوفو شاعل شي كازا، مكيحملهاش، كيكمي طابا جون، غي كتشوف فيه كتعرف أنه أقدم من الحبس وأقدم من النص فهاد لمدينة، كان بحال شي مومياء حية، أو بحال شي مستحثة، ديما لابس شورط وبيل نص كم فالليالي، وعريان فالصيف، إيامات الثلج عاد كيبانليك زاد شي جاكيطة ولبس سروال كيطمة، ورجليه ديما فصندالة ديال الميكة.
عايش فالحبس غي بالجقير، ومرة مرة كيسيفطليه واحد خالو كولية ديال الكارو وشي تويشيات دغية كيطب فيها، واخا كان غي كيجقر، كان الى وقفتي عليه يقصم معاك داكشي لي عندو، كان كولشي كيحتارمو وكيوقرو، وكيتمازحو معاه الدراري ولكن كان الى طلعات ليه القردة كولشي كيفوتو حيث يقدر يدير أخطر الجرائم معندو سوق، الى قاليك فلان بلا متنعس ليوم، فراه بصح خاصك متنعسش حيث يقدر يشعل فيك العافية أو يسلقك بشي براد، راه معندو آش يخسر وماباغيش يخرج من الحبس أصلا.
دخل للحبس ف1988 باقا يالله عندو عشرين عام، بتهمة القتل العمد ضد الأصول، قتل الأم ديالو، حسب مكيحكي هو فراه واحد ولد القحبة عايرو بأنه ناك ليه مو، وعطاه النعت على شي توحيمة فيها، السيد كان برهوش ديك الساعة، هز ساطورة وطلع عند مو، وقف عليها وبدا كيعري فيها، حيدات حوايجها حتى شاف التوحيمة وهو يبدى يكزر فيها، خرج كيقلب على خونا ملقاهش، شدوه عطاوه تلاتين عام، وحيث ضد الأصول فراه ممنوع من أي عفو ملكي، تلاتين عام طون وحرور،( بالبيضانصية المونتيف طون وحرور هو المونتيف كامل بلا عفو).
ورغم ذلك الخال ديالو كان كيسيفطليه الكولية طيلة 25 سنة، متخلاش عليه أو فاتو، واخا حتى هو مقودة عليه، ولكن منساهش، كان كيدور ليه فالتيليفون مكيفوتش معاه جوج كلمات: ألو خالي، والكارو الكارو، واوا كميت هاداك لي سيفطتي ليا، سيفط ليا شي كولية راني مقطوع.
أي واحد جاتو الزيارة فكان حق لهويدي فيها، مسألة رجولة ماشي إبتزاز، وحتى هو مكانش كيطلب شي حاجة كثيرة، خاصو غي الكارو والسكر و أتاي والخضيرة ديال شي كويميلة، وشي شوية ديال الديسير وشي نص ديال لحليب يصاوب بيه عويصير.
مكانش كيكثر الهدرة مع بنادم وغالبا كينطق بشي جمل حكيمة وعميقة، منها ، حيد بالاك، أرى دفع لحمار يسير، طز، كان غي كيسخن الحال كيحماق، حيث دوز معاهم طناش لعام ديال لقريعة، وكان كولشي كياخد التهديدات ديالو على محمل الجد، حيث عندو سوابق كثيرة فتنفيدها حرفيا، واحد المرة ناض فتلاتة ديال الليل ومشا عند واحد شاف شامبري سنطراوي حتى هو كان دوز رويحة وخرج، وقاليه شوف نتا عارف وأنا عارف، بغيت براد ديال أتاي دابا، المشكل كان كيفاش غادي تدير تقنع لهويدي لي قلواني فتلاتة ديال الليل أن الضو مقطوع والريشو مخدامش، شاف فواحد البياع ديال موالين الوقت وقاليه نتا متنعسش، وكذلك كان مشافش هاداك البياع النعاس كيداير، الليل كامل وهو كيتخايل السيناريوات لي يقدرو يوقعوليه الى نعس، دوزو معاه ليلة كيرغبو فيه يرجع ينعس، وحت الموظفين ديال الليل جاو، ودبروليه على دكة من أتاي ديالهم وبالرغيب والمزاوكة عاد نعس وواخا نعس البياع منعسش حيث كان كيقول أن الهويدي يقدر فأي لحظة ينوض ويقسمليه راسو على جوج بشي طاجين.
واحد النهار مشيت عندو طلبتو على شي سلك الى مخبيه بغيت نديرو لانطير للراديو، وهو يقول ليا: كون جيتيني شحال هادي كون دبرتو ليك، دابا مع قربت نخرج مابقيتش كنجمع داكشي،..... بقيت كنشوف فيه صدمني مالقيت منقوليه، باقا ليه 5 ديال الحبس وقاليك قرب يخرج، أنا غي عام ونص شيباتني كيبانليا ماغادي نخرج من داك أزيلال حتى القرن الجاي.
بعض المرات كنا كنجمعو أنا وياه، كيقوليا أودي دابا أنا كون غي خلاوني هنا فين غنخرج فين وآش غادي ندير برا، وبصح كنت كنبقى نفكرليه ملي غادي يخرج ف2018 ويشد فيديه آيفون 11، باش غادي يحس، وللى تدوز من حداه آودي أ سيس إغ إس موديل 2018، راه يقدر دماغو يسكت، السيد خلا التلفازة قد الماريو غادي يخرج غادي يلقاها ولات 3 دي، وديما كنت كنحاول نتخايلو كيتفرج أفاتار 3 دي، كيفاش غادي يحس و آش غادي يدير.
ملي كانت كتجي عندي الواليدة وكتبقى تسولني على شحال باقي وشحال دوزت، كنقوليها شوفي الواليدة، راه حتى كيطوال عليا هادشي وكيبان ليا لهويدي دايز غي كنشوف فيه كنلقى راسي راه خارج غي غدا، عام ونص كيما كيقول هو دوزتها غي حزاق، أو غي كنلعب فميعناتو.