ماشي من "المصداقية" ولا من "المعقول" دخول التراكتور للحكومة. مع هاد التحالف ما غادينش "نزيدو القدام". وهبي: ما كنفهمش اخنوش ويمشي يقابل فلوسو وغادي نعارضو بقوة وما عمرني نخدم معاه

من المتوقع يلتقي هاد الصباح عزيز اخنوش رئيس التجمع الوطني للاحرار رئيس الحكومة المكلف بتشكيلها فعبد اللطيف وهبي امين عام حزب الاصالة والمعاصرة. بعدها غادي يتلاقى بامين عام حزب الاستقلال نزار بركة. بجوج اللقاءات كتدخل فاطار المشاورات اللي بداها زعيم لحمامة لتشكيل اغلبية مريحة.
هذا هو اللقاء الثاني ليه بهادو بجوج. لقاء السبت فالصباح كان غير رسمي. دار وباش ما يبانش وهبي للصحافيين هبط للكاراج وخرج منو بلا ما يشوفو حد وفق مصادر "كود".
دابا المشكل الاخلاقي اللي كيضرب الممارسة السياسية عندها هو دخول الاصالة والمعاصرة للحكومة. علاش؟ حقاش وهبي كان معارض شرس وبزاف ماشي للتجمع الوطني للاحرار بل لزعيمهم عزيز اخنوش. ما نهدروش على تشكيكو فتزوير الانتخابات من خلال توزيع حزب لحمامة للفلوس فالانتخابات كيف قال فوكالة الانباء الفرنسية٬ اللا ماشي غير هادي. راه قال وتصريحاتو موجودة٬ امور كثيرة ضد اخنوش.
عزلنا ليكم 6 جمل قالها وهبي لوسائل اعلام مغربية:
ايلى تعينت رئيس حكومة: ابدا ما نديرش عزيز اخنوش وزير ونخليه يمشي يقابل فلوسو
ما ستاطعتش نفهم السي عزيز اخنوش. صعيب تحاور معاه. صعيب تفهمو
لا التجمع ولا وزراء التجمع كيديرو السياسة. راهم باغيين يتحكمو فالقرار السياسي. كيسيرو اموالهم من خلال السياسة
عرفتي كيف كيجي =اخنوش= للبرلمان؟ راه ادريس البصري ما كانش كيجي هاكاك
التجمع الوطني للاحرار لا يمكن ان نشتغل معه حالا او مستقبلا
يمكن يبقاو فالحكومة او بخرجو منها هاذا امر يهمهم. سأمارس المعارضة
هاد التصريحات راه غير قليل من كثير قالو وهبي ضد اخنوش. اليوم غادي يجي لمقر التجمع الوطني للاحرار فالرباط ويشوف فوجهو ويضحك قدام الكاميرا ويدير تصريح ويمشي بحال ايلى ما عمرو قال ديك التصريحات.
دخول البام للحكومة ضرب لمصداقية العمل السياسي كيف رفعها حزب الحمامة. يستحيل نزيدو بالبلاد للقدام٬ كيف قال شعار التراكتور فالانتخابات الاخيرة٬ ضرب كذلك ل"اغاراس اغاراس". حقاش السياسة خاصها الحد الادنى من المعقول. هاد التحالف مع البام راه ضد المعقول ضد المصداقية. بعض قادة الاحرار اللي كيدافعو على هاد التوجه راهم ضد رئيسهم وضد حزبهم وضد بلادهم حقاش حكومة بلا معارضة كبيرة =بحال البام= راه خطر على مستقبل المغرب.
حزب الاحرار عندو حلفاء قادر يدير معاهم تحالف ومريح: الاستقلال والاتحاد الاشتراكي. فقط لا غير. دخول البام غادي يكون مكلف بزاف بزاف لاخنوش. فاللخر لمغاربة غاديين يحاسبوه هو لا ماشي ناس التراكتور.