عبقرية مهندس تقارب البي جي دي بالبام. كيفاش هاد المخ اللي ماشي هو وهبي او اللي معاه فالحزب دار هاد الضربات باش يحيد "الضحية" على اللامبا ويبعد بنكيران ويعطي شرعية ل"الوافد الجديد" ويعمر التيران

اجتماع السبت بين الأمين العام لحزب العدالة والتنمية سعد الدين العثماني والأمين العام لحزب الأصالة والمعاصرة وعبد اللطيف وهبي بمقر البي جي دي ما دارش فاطار "التواصل المنتظم مع الأحزاب السياسية الوطنية، فرصةً لتبادل الرأي والتشاور بشأن مجمل المستجدات التي تطبع الراهن الوطني" كيف قال بيان الحزبين.
ساذج اللي غادي يعتاقد ان هاد الاجتماع دار باش يواجهو التجمع الوطني للاحرار. وديك الجملة ديال "رفض كل الأساليب الساعية إلى المساس بنزاهة وحرية الاقتراعات خصوصا عبر أساليب الاستعمال المريب للمال الانتخابي وكذا استعمال بعض أدوات الترغيب والترهيب ضد بعض الفاعلين الحزبيين، مما يستدعي اليقظة والتدخل الحازم من قبل السلطات المختصة للقيام بواجبها في صون الانتخابات المقبلة من عبث العابثين" غير للتمويه. حقاش شكون كيخدم لفلوس فالانتخابات؟ البام دارها وجاب ولد زروال فانتخابات 2016 والبي جي دي كيخدم جمعياتو وفلوسها والدين حتى هو. يعني الترغيب والترهيب خدمة هاد الحزبين.
ساذج اللي كيعتاقد باللي وهبي هو اللي كيفكر للحزب. شفتو فقضايا كثيرة مؤخرا ولى غير كومبارس. كلشي كيديرو محمد الحموتي وفاطمة الزهراء المنصوري ولاعبين ولاعبات ما كيبانوش. الوحي كيجي من هنا وكيوصل للحزب باش يتحرك.
علاش هادي ضربة معلم للي كيفكر للبام؟ هادي ضربة معلم حقاش حيدو للبي جي دي سلاح كان كيجيب بيه اصوات كثيرة وهو المظلومية. راه مظلوم راه كيآمرو عليه. هادي من المرات اللولى اللي البي جي دي ما بقاش بوحدو اللي كيتشكى. جابو ليه حزب وماشي اي حزب. جابو ليه حزب تخلق اصلا باش يحاربو. باش يقضي عليه. قالها احد قيادييه من نهار التأسيس وعاودوها من بعدو.
هاد الضربة حيدات للبي جي دي ورقة المظلومية. عمرات التيران وما خلاتوش بوحدو اللي كيتشكى، بل رجعاتو كيتشكى من درجة ثانية. هادي مهمة للدولة بزاف. دابا هاد الحزب ما بقاش ضحية كيف كيصور راسو.
هاد الضربة عطات "شرعية" للبام او الوافد الجديد كيف سماه ادريس لشكر ايام الولادة٬ بعدات على الدولة تهمة رعايتو ولو مؤقتا. حقاش جهة فالدولة اللي ولاداتو ورضعاتو ورعاتو وما عمرها تتخلى عليه. هاد الضربة ربطات البي جي دي. دابا كيف ما كانت نتائج الانتخابات والحزب عارف ان فوزو كينقص يوم بعد يوم٬ غادي يقبل بها. المثالي بالنسبة لمهندسي هاد الشي هو يبقى البي جي دي فالحكومة المقبلة بعد ما يجي الثاني او الثالث. كنشوفو سيناريو الاتحاد الاشتراكي فحكومة جطو. لجمو اليازغي باش دخل للحكومة وبدات نهاية الاتحاد الاشتراكي الطويلة.
ايلى ضربات البي جي دي غادية تضرب معاها طبعا العدل والاحسان وكاع اللي كيلعب من اللحايا فالسياسة.
هاد الشي غادي يعاون حتى الاحرار. الدولة ما دارتش بيضها فسلة وحدة. شي كيتحرك وشي كيعارضو. غدا ايلى داو الانتخابات صحاب لحمامة ما كاين اللي غادي يتشكى او يغوت.
الغريب ان البي جي دي ايام بنعرفة عطى هدية فابور للبام. ما خدا مقابل. ما استافد من حتى حاجة. مهندس هاد الشي هو المستفيد الاول.
هاد الضربة ربحات ديك الجهة فالدولة نقطة اخرى وهي ان هاد الاعلان غادي يخلي بنكيران عبد الاله يبعد من الحزب حتى تسالي الانتخابات. يعني حيدو للبي جي دي بيلدوزر ديالو. كانت مشاركتو فهاد الحملة مستحيلة تقريبا ولكن بهاد الاعلان وبلى ما يخبروه كيف كشفات مصادر "كود"٬ زادو فابعادو عن الشأن الداخلي للبي جي دي على الاقل حتى تسالي الانتخابات التشريعية والبلدية.
صحاب الوحي جنون. هما اللي جابو القاسم الانتخابي والبام فاللول بغى يعارضو وفاللخر كان اكبر مدافع عليه. دابا دخلو لفقيه بنعرفة فدائرة ايلى خرج منها ما يقولها لحد. طبعا غادي يخرج وهو دايخ ومطيح معاه حزب كولو