بعدما تحكمو ملفات آخرين.. علاش استئنافية كازا مازال ماعينات جلسة على الضوصي ديال مجلس جماعة بني يخلف اللي نايضة عليه روينة؟

بعدما فصلات استئنافية كازا الادارية فالأيام الاخيرة فعدد من الملفات اللي كتهم الانتخابات الفايتة والخروقات أو الطعون اللي وقعات فيها، مازال واحد الملف بقى معلق بلا مايدار فيه تا حاجة.
ملف الطعن فعضوية أحد المستشارين الجماعيين اللي ربح مقعده بطريقة غير قانونية، وهو الأمر اللي أكداتو ابتدائية كازا وقالت أن القانون واضح في حال تساوي عدد الأصوات، بأن الأصغر سنا هو اللي كيربح فالأخير.
هاد الملف اللي كان سبابو قائد بني يخلف اللي متحالف مع الرئيس السابق، فبعد تساوي عدد الأصوات فإحدى دوائر جماعة بني يخلف، التابعة لعمالة المحمدية، خالف القائد القانون واعتبر أن الفائز هو مرشح حزب الاستقلال اللي هو الأكبر سنا ماشي مرشح حزب التجمع الوطني للأحرار اللي كيتعتابر الأصغر سنا.
الأحرار مشاو للمحكمة وحكمات لصالحهم ابتدائيا، لكن فالاستئناف يبدو أن الضوصي مازال مبلوكي لحدود الساعة، ومازال رئيس المحكمة ماعينش ليه أول جلسة، في حين أن ملفات آخرين دخلو معاه فنفس الوقت تعينات ليهم الجلسة ودازو جلسات وصدرات بخصوصهم أحكام كَاع بحال ملف محمد الضاوي رئيس جماعة عين حرودة وغيره.