سكوب. فضيحة هادي. الخارجية مخلية لمغاربة حاصلين كيعانيو برا ودارت رحلة باش دخل وزيرة حصلات فمدريد فمؤتمر كان غادي يكون فمراكش

علمت "كود" ان ناصر بوريطة وزير الخارجية والتعاون عطى ترخيص لرحلة نهار السبت من مدريد لكازا. وفق مصادر "كود" فهاد الرحلة فيها 48 مسؤول شاركو فشي مؤتمر على السياحة كان غادي يكون فمراكش وحيدوه ليها.
وفق مصدر "كود" فبوريطة عطى هاد الترخيص حقاش كاينة فيه وزيرة السياحة فاطمة الزهراء عمور ومسؤولين فمؤسسات كتهتم بهاد القطاع.
دابا لمغاربة حاصلين فدول كثيرة وكيعانيو من نهار تغلق الحدود وبوريطة كيهمو فقط عضو فالحكومة اللي فيها باش تدخل للبلاد.
الوزيرة ممكن تدخل فطيارة خاصة برخصة من الخارجية وكلشي غادي يتقبل هاد الشي حقاش كانت كتمثل لبلاد٬ لكن تدخل مع 47 شخص اخر فهنا الامور فشي شكل
يعني كيقول للمغاربة شدو الصف مازال ما وصلش وقتكم.
اليوم الناطق الرسمي باسم الحكومة قال باللي غادي يكونو رحلات استثنائية باش يرجعو لمغاربة للي حاصلين بلا ما يقدم حتى شي معطيات علي وقتاش غادي يبدا هاد الشي ومنين غادي يبدا. والو والو.