واش گاع اللي عندهم 75 عام بدا تلقيحهم او حددو ليهم وقتاش؟.. اللا وكاين اللي فايت 85 ومازال ما عارفش وقتاش. مصدر ل"كود" : هاد الشي كيتعالج

وزارة الصحة قالت النهار الاول باللي المعني باللقاح بين المواطنين هما اللي عندهم 75 عام والفوق. الخبير في الصحة العمومية الطيب حمضي اعتبر هاد الامر عادي حقاش هما الفئة الاكثر تعرضا للفتك ايلى وصلها الڤيروس، طبعا بالاضافة الى ان هاد جوجت المليون لقاح اللي وصلاتنا من استرازنيكا و500 الف ديال "سينوفارم" تكفي بالاضافة الى اطر الصحة ورجال السلطة والتعليم وهاد الفئة العمرية.
لكن واش كلشي اللي عندو 75 والفوق باش رسل رسالة ل1717 او دخل لموقع درتو الدولة "لقاح كورونا" غادي يتوصل بالنهار اللي غادي يدير اللقاح؟
اللا. كود عندنا حالات كثر من 85 عام وباش يدخلو يعطيهم فين غاديين يديرو اللقاح ولكن مع عبارة غبية "تحديد تاريخ اللقاح بك في طور البرمجة" ويزيدو باللي غاديين يخبروك برسالة نصية.
وزارة الصحة كتقول باللي ممكن يكون اسم المعني فالمركز وما طلعتش فالسيسام كيف قالو ل"كود". هاد الشي ماشي منطقي يرد مصدر ل"كود".
شي مسؤول فالصحة قال ل"كود" باللي القضية تقدر توقع وباللي كاينين اللي فايتين 75 وتعطلات عليهم. طبعا جواب ما مفهومش. باش تعطلات علاش درتو فبيان رسمي باللي كلشي اللي عندو 75 والفوق راه يبدا لقاحو من بعد ما دار محمد السادس اللقاح الخميس اللي فات
توقعت مصادر ل"كود" باش هاد الاخطاء تتقاد من غدا الاثنين 1 فبراير.
لحد الان ما كايناش معطيات رسمية شحال من واحد عندو 75 عام والفوق ووقع ليه اللي وقع للحالة اللي هدرات معاها كود