كوبل سياسي تزوج بشهادة عزوبة مزورة فكازا

فضح واحد العرس دارو رئيس جماعة ولاد عزوز الأسبوع الماضي، لمناسبة زواجو بعضوة بالجهة، عملية تزوير طالت وثائق الزواج خصوصا شهادة الخطوبة "عازب"، وخلا الناس حالا فمها فهاد الرايس لي نجح في الانتخابات الأخيرة، وظفر برئاسة المجلس من بعد، وكملها وجملها ملي تزوج بعضوة ديال الجهة ضد القانون.
الأخبار اللي وصلات لكود تتأكد بلي شهادة الخطوبة خرجات من الجماعة وعليها إمضاء موظف في الحالة المدنية، وهي اللي تقدمات لمحكمة الأسرة باش تعطي الإذن بالزواج.
الناس ديال المنطقة استغربو لهاد القضية، خصوصا أن الرئيس مزوج وعندو ولاد، ومراتو رفضات تعطيه التصريح بالإذن بالتزوج عليها بمرا ثانية.
الكوبل السياسي الجديد اللي كينتمي الاغلبية حضروا ليهم الناس وباركو ليهم، قبل ما تفجر هاد القضية، واللي وصلات للسلطات.
وقالت مصادر متطابقة ل"كود" بأن السلطة المحلية باشرات الأبحاث ديالها ومشات للسجل تاع الشهادات باش تتأكد من الموظف اللي دار هاد الفعلة، وخا في الحقيقة الرئيس حتى هوا تيتحمل المسؤولية حينت الموظف تابع ليه، خصوصا أن القانون تيمنح لرئيس الجماعة صفة ضابط الحالة المدنية وهوا اللي تيفوضها للموظفين اللي تيختارهم باش يمارسو هاد الصفة، وتيبعث لوكيل الملك بنسخة من القرار.
دابا القضية غاتحماض مزيان، ومن المنتظر تدخل النيابة العامة على الخط، لأن التلاعب بسجلات الحالة المدنية أمر خطير، والتزوير ديالها أخطر.