وزارة الصحة حطات منشور تسجيل 29 حالة مصابة ب”كورونا” فالمغرب وحذفاتو وعاود حطاتو وخربقات الصحافيين والمواطنين

وزارة الصحة علنات، فالصفحة الرسمية ديالها فموقع التواصل الاجتماعي “فيسبوك”، هذ الصباح، بللي الحالات اللي تسجلات بفيروس “كورونا” المستجد وصلات ل29، بمعنى تزادت حالة وحدة على لبارح، لكن دازت غير جوج دقايق وهي تحذف المنشور، وغير دابا شوية عاودات حطاتو، والناس تخربقو.
الوزارة بينات على التردد ديالها فنشر المعطيات والمعلومات، وبللي ماتايقاش فداكشي اللي كاتحد، و”كود” بمجرد حذف المنشور فالمرة الأولى تواصلات مع الوزير والمكلف بالتواصل فالوزارة ومدير الاوبئة باش تستفسر على اشنو واقع، وحتى واحد فيهم ما كايجاوب، حتى لشوية عاد حطات تاني هذ المنشور، والصحافيين مابقاوش عارفين واش المعطيات اللي فيه صحيحة ولا لا.
من جهة أخرى، هذا ثالث آنفوكَرافيك كاتخرج الوزارة قبل ما تخرج البلاغ، وفالحالات بجوج اللي سبقو كانت كاتتعطل بزاف باش تخرجو، وفاش كايخرج الناس كيتهولو وكيحساب ليهم واش تسجلو حالات جديدة، فالوقت اللي البلاغ فيه غير تفاصيل للمنشور الانفوكَرافي اللي سبقو بساعات.
وكيبقى غياب البلاغ لحد الآن واللي يقدر يشمل تفاصيل أوفر كيخلي القضية تتلف بالغموض، ومن بعد هذشي اللي وقع ديال حذف الانفوكَرافي وإعادة نشرو من جديد، يمكن للواحد يشك فخبر تسجيل إصابة جديدة بالفيروس، فهذ الظرفية الصعبة اللي كيمر منها المغرب والعالم كلو.