حكيم شملال مستشار فبلدية الناظور ل"كَود": إسبانيا ديما كانت كتلعب مع المغرب بهاد الورقة واليوم حققنا مكسب كبير بالاعتراف ديالهم بسيادة المغرب على الصحرا

عبد الحكيم شملال، مستشار فبلدية الناظور بألوان حزب الاشتراكي الموحد، قال فتصريح خاص ب"كَود" بللي الاعتراف اللي علنات عليه إسبانيا على دعم مبادرة الحكم الذاتي فالصحرا المغربية، ولكن تساءل على المقابل اللي تعطى لها باش تقلب التوجه ديالها بهاد الطريقة.
وأكد حكيم بللي العلاقات الديبلوماسية بين الدولتين، كانت متشنجة لسنوات، حتى قبل ما يتسدو الحدود، بحيث أن إسبانيا كانت ديما كتتحرك بهاد الورقة ديال الإعتراف بالسيادة على الصحراء، كيما هي محتلة مدينة مليلية وسبتة، بحيث شدد على أن البلاغ ديال السلطات الإسبانية جا فيه بلي هما كيحتارمو السيادة ديال بلادنا، وواش مليلية وسبتة المحتلتين إسبانيتين وخاص المغرب يحتارم هاد الأمر.
وشدد حكيم شملال بالتأكيد على أن الديبلوماسية المغربية بالقيادة ديال الملك محمد السادس، جابت مكسب كبير بزاف، وسدات الفم للأعداء لي هما كثار، وباش تجيب صبليون للائحة الدول لي كتدعم المغرب، راه واحد الخدمة ماشي ساهلة.
وكيتمنى حكيم شملال فلأيام المقبلة، تزيد الفرحة تكبر ويتحلو المعابر لي كتربط الناظور ومليلية المحتلة، حيث بزاف ديال ولاد المنطقة تأثرو نفسيا حيث ماتلاقاوش عائلاتهم لمدة كبيرة، زيادة على الجانب الاقتصادي لي نقص بزاف، ولكن هو ضد فتح الحدود بالطريقة والعشوائية لي كانت قبل.