عندهم أزمة كبيرة.. تجار صبليون جاو للمغرب باش يستوردو الزيت وطحين ديال المغرب وها شنو قال مصدر "كود"

كتعيش مؤخرا إسبانيا أزمة كبيرة وزيادة قياسية فمجموعة دلمواد الأساسية بحال الزيت وطحين، الشي لي دفع تجار كبار يجيو للمغرب باش يشريو السلعة باش يصدروها لبلادهم.
هاد الأزمة لي كتعيشها سبانيا ومدينتي مليلية وسبتة المحتلتين، تطورات وخلات الجهات المسؤولة دير قوانين جديدة باش ما توقعش شي كارثة عندهم.
رشيد وهو تاجر كبير فمدينة الناظور، أكد بلي استقبل فلأيام الأخيرة مجموعة ديال الصبليونيين لي بغاوه يبيعلهم الزيت وطحين باش يصدروها لبلادهم، ولكن القانون المغربي مكايسمحلوش يدير تجارة بهاد الطريقة.
وزاد رشيد، قال بلي هاد الناس إلا بغاو يشريو هاد المواد ويصدروها، لازم عليهم يتعاملو مع المعامل ديال هاد المصنعة بشكل مباشر.
وأشار المتحدث بلي التجارة بحال هادي كيأطرها قانون، لي كيخلي بحال هاد التجار يستافدو حتى هما من الإعفاء على الضريبة لي كتختالف فلمغرب بين 7 و10 و20 فلمية حسب نوعية المواد.
وأشار رشيد ل"كود" بلي السلعة ديال المغرب ولات مطلوبة فسوق دسبانيا، خصوصا بعدما تسجيلات عندهم أزمة فزيت المائدة لي وصل ثمنها فمليلية المحتلة ل 20 إورو لخمسة لتر فحين هنا يقدرو تتقام عليهم بقل من 80درهم، فحين الطحين يقدر يتقام عليهم بقل من 3 دراهم للكيلو.
وأكد على أن الطحين ميمكنش يتصدر لإسبانيا حيث مدعم من طرف الدولة، إلا في حالة كان شي اتفاقية بين البلدين، خصوصا بعدما تحسنات العلاقة فهاد اليومين الأخرين.
من جهة أخرى أكد مصدر من الميناء التجاري دالناظور ل"كود" لي كيتواجد فبني انصار، على أنه لحدود الساعة مكاين حتى شي عملية تصدير لا الزيت ولا شي مادة أخرى.
وأكد بلي فهاد الحالة، أي عملية غادي تكون بالقانون المأطر لعملية التصدير.