كلشي كيسول منين جات هاد الفلوس؟.. 300 مليون حطاتها مرات موظف سابق ف"بنك أفريقيا" من أجل متابعتها فحالة سراح فقضية "بابور الصغير"

معطيات جديدة كيف العادة بانت فقضية البرلماني ديال الإتحاد الدستوري، النصاب "بابور الصغير"، اللي مضروب ب5 سنين سجن نافذ، ومزال تابعينو ملفات أخرى غادي يغرف فيها ديال بصح.
المعطى الحصري اللي اطالعات عليه "گود" وهو أن مرات موظف سابق ف"بنك افريقيا" المدعو "رشيد فهيم"، واللي طردوه من البنك في سنة 2016 بسباب هذا الملف الخانز وبقى كايدوز ليه "البابور" فحسابو الخاص الصالير ديالو حتى لعام 2018، واللي كان تشغل منصب المسؤول التجاري في وكالة "زينيت"، هاد المرا دفعات نهار تزلزل "بنك إفريقيا" كفالة ديال 300 مليون سنتيم كضمانة باش تابعات فحالة سراح من طرف قاضي التحقيق فجنايات كازا.
القصة ديال هاد المرا هي أنها أثناء حصول البرلماني على قرض من "بنك افريقا" واللي المجموع ديالو 35 مليار سنتيم، ولكن تفرشات القضية و بدات العلاقة تتخسر بين البابور و راجلها رشيد فهيم، اللي كان هو المسؤول عن القرض فوكالة الاعمال "زينت"، وحول مبلغ مالي بلغ أكثر من 3 مليار سنتيم لشركة في مرات فهيم في ظروف غامضة. هذا المبلغ تهز من حساب شركة "فورصال تراضين" أو شركة "سامي اويل"، اللي كانو كيتحكم فيهم البابور ، هذا الفيلم شدو هاد البابور على فهيم.
دبا يمكن نطرحو هاد السؤال، منين جابت زوجة ديال فهيم هذا المبلغ الكبير؟ أييه 300 مليون اللي حطتها كضمانة للمحكمة واللي دابا حتى هي فيها نقاش، ومزال هادشي ديال البابور الصغير ماغاديش يسالي تا غادي يطيح رؤوس كبار أخرين.