ها كيفاش البرلماني البابور الصغير اعترف عند الفرقة الوطنية على الطريقة لي سهل ليه بها المدير العام لبنك افريقيا باش ينصب بالمليارات

ملف البابور الصغير الخانز جابت فيه" گود "معطيات جديدة وحصرية استقاتها من مصادرها اثناء التحقيق مع هاد البرلماني ديال الدائرة الانتخابية سطات النصاب .
البابور الصغير قال في التحقيق معه من لدن المكتب الوطني لمكافحة الجريمة الاقتصادية والمالية بالفرقة الوطنية للشرطة القضائية بالدار البيضاء، ان واحد سميتو رشيد فهيم كان خدام في مركز الأعمال في البنك الإفريقي هو لي فتح ليه كونط وبلي المفضل لحليسي الرجل التاني في بنك أفريقيا بعد بنجلون هو لي قاليه باش يتعامل معه في هاد الاتجاه.
المعطيات كتقول ان البابور الصغير جا لمنطقة زينيت حدا سيدي معروف وتما فتح الكونط، وشوية لمفضل لحليسي ورك باش تعطى قروض بنكية لشركة "سامي أويل" ديال المحروقات لي دارها البابور في الاصل، وخذات الشركة قرض ديال 12 مليون درهم.
البابور اتهم هذاك الموظف لي في زينيت بانه كان كيسرق الفلوس من حسابات شركتو سامي أويل او تدوزها في حساب شركة في الاسم ديال مراتو .
المهم وفق مصدر مطلع لي قال لموقع "گود "راه بابور الصغير بقى غير كيدخل ويخرج في الهضرة، كيهضر على شيكات ضد شركتو وزيد وزيد.
هاد الشي مرون عند البرلماني النصاب ومزال غادي نجيبو ليكم الجديد في هاد الملف لي باقي فيه تحقيقات جارية على قدم وساق من طرف عناصر الفرقة الوطنية من اجل اسقاط جميع المتورطين المفترضين في هذا الملف .