زعيمها يلاه خرج من الحبس.. الجوندارم فالدريوش طيحو عصابة كتشفر الديور والمحلات التجارية

تمكنات عناصر الدرك الملكي تحت إشراف قائد المركز الترابي فالدريوش، من تفكيك عصابة إجرامية تورطات فسرقة منازل سكنية ومحلات تجارية، ونشرات الرعب فسكان المنطقة فالشهورة الفايتة.
وحسب مصادر محلية، هاد الريزو كيتكون من 4 أشخاص، كتتراوح الأعمار ديالهم ما بين 20 و28 عام، وكينحادرو من الدريوش وإقليم كَرسيف، وكلهم مغرقينها سوابق قضائية، وتم تحديد بلايصهم بعد تتبع وترصد، قبل تدخل محكم مكن الجوندارم من اعتقالهم.
وحسب المصادر نفسها، فإن زعيم العصابة، اللي يلاه خرج من الحبس هادي أشهر قليلة، تم الإيقاع به فواحد الحي، نواحي مدينة الدريوش، بعدما تم رصد تحركاتو بالإستعانة بكاميرات المراقبة الخاصة.
وأضافت المصادر نفسها بللي راس العصابة، بعد تعميق البحث معاه فإطار البحث اللي دارتو عناصر الدرك الملكي، اعتارف بأسماء جميع الأشخاص اللي معاه فالريزو، قبل ما يتم الإيقاف ديالهم كلهم فظرف وجيز، كما تم حجز المعدات اللي كانو كيستعملوها فمختلف عمليات الشفرة اللي نفذوها سابقا.
وتم الإحتفاظ بالموقوفين رهن تدابير الحراسة النظرية، في إطار البحث اللي كتشرف عليه النيابة العامة المختصة، فانتظار تقديمهم للعدالة اللي غتقول كلمتها فحقهم، حسب المنسوب إليهم.