مروع سكان المنطقة.. جوندارم "بن الطيب" فإقليم الدريوش طيحو بزناس ديال القرقوبي

تمكنات عناصر الدرك الملكي ديال سرية "بن الطيب" فإقليم الدريوش، عشية اليوم الثلاثاء، من إيقاف شخص توصف من طرف متتبعين للشأن المحلي، بأخطر مروج للقرقوبي فالمنطقة.
وحسب مصدر مطلع قال بلي هاد البزناس ماكانش غير خدام على ترويج الممنوعات، ولكن أيضا كان خالق الرعب حتى فساكنة المنطقة، بحيث كان كيتعدى بزاف، وآخر شكاية دارها به واحد من السكان تعدى عليه البارح.
ومباشرة بعد ما دار المعتدى عليه شكاية عند مصالح الدرك الملكي، دار قائد المركز خطة محكمة باش يطيح هاد العنصر الإجرامي، اللي كان ديما كيفلت منهم بمساعدة أشخاص قراب ليه.
الموقوف تحجزات عندو مجموعة من الأسلحة البيضاء وكمية من القرقوبي وعقار الإكستازي المخدر، بحيث توضع فالحراسة النظرية رهن البحث اللي كتشرف عليه النيابة العامة المختصة، باش يتقدم للعدالة اللي غتقول كلمتها فحقو حسب المنسوب ليه.