اعلن وزير الداخلية الفرنسي جيرالد دارمانان فتويت على اعتداء وقع فكنسية بنيس الفرنسية اليوم الاحد 24 ابريل 2022. واحد ضرب قس بموس فصدرو وساقو. حسب الوزير شدو مول الفعلة. طبعا ففرانسا باش كتوقع بحال هاد الاعمال كيقولو عملية ارهابية غير اليوم ما يقدروش. اليوم كاين الدور الثاني للانتخابات الرئاسية وفرضية بحال هادي كتخلي زعيمة اليمين المتطرف مارين لوبين توصل للاليزي كاول امرأة وكاول يمينية متطرفة لرئاسة فرانسا صحف كبيرة ما تسوقاتش بزاف لهاد الخبار اللي كتهتم بيه فالايام العادية. نقلات خبيرات قليلة عليه. وحتى اللي نقلات هدرات على شخص كيعاني من اضطراب "بي پولير" غير هو فنفس النهار من العام اللي فات وقع نفس الهجوم فنفس المدينة وكانت دوافعو ارهابية. طبعا وزير الداخلية هدر على هاد الشي. حقاش يستحيل يقدر يخبي هجوم بحال هادا. الاعلان جا مع الثمنية و49 دقيقة اي 49 دقيقة بعد فتح مكاتب التصويت لواحدة من اهم الانتخابات الرئاسية فتاريخ فرنسا المعاصر. هاد الدور الثاني كيجمع بين الرئيس المنتهية ولايتو إيمانويل ماكرون (44 عاما) وزعيمة "التجمع الوطني" مارين لوبان (53 عاما) عن اليمين المتطرف. 48,7 مليون فرنسي غاديين يختارو بين رجل وامرأة. رجل مكروه وتعرضات ولايتو لهزات واحتجاجات كبيرة خاصة من صحاب الجيليات الصوفر وكيشوفوه الفرنسيين معفر وكيحتاقر الناس لبساط وبين مرشحة اليمين المتطرف اللي معروف برنامجو كيسبح على امواج الوطنية والشعبوية وضد الاجانب وضد الناتو وضد الاتحاد الاوربية فصيغتو الحالية واللي عندها علاقة مع بوتين رئيس روسيا واللي سبق لابناك روسية سلفاتها حسب استطلاعات الرأي٬ ماكرون اللي مرشح يربح ولكن بينو وبين لوبين نسبة قليلة. الصناديق اليوم تقدر تكذب هاد الاستطلاعات التصويت غادي يسالي مع الثمنية. فرنسا تقدر تدخل نادي الدول اللي كيحكمها اليمين المتطرف داخل دول الاتحاد الاوربي ولكن غادية تكون اهم دولة فهاد الاتحاد اللي يوصلها هاد التيار. زلازل كثيرة غادية توقع ايلى وصل اليمين المتطرف