الانتخابات الرئاسية الفرنسية. المعجزة ما طلعاتش ولد طنجة للدور الثاني واليمين المتطرف قريب للاليزي. بوبين وماكرون فمواجهة مختالفة على 2017

البارح الاحد 10 ابريل 2022 مع اعلان النتائج الاولية للدورة الاولى من الانتخابات الرئاسية الفرنسية كان بين الثانية اللي هي مارين لوبين رئيسة التجمع الوطني =يمين متطرف= والثالث جون لوك ميلانشون رئيس "فرنسا الابدية= اليسار الراديكالي= 3 نقاط. مع لطناش الليل النسبة قربات بزاف ووصلات 0.8 بالمائة. صحاب ميلانشون اللي تزاد وعاش طفولتو فمدينة طنجة٬ بداو يثيقو باللي ممكن يوليو فالرتبة الثانية. هاد الرتبة اللي كتأهل للدور الثاني من الانتخابات الرئاسية لمواجهة ايموانويل ماكرون "الجمهورية الى الامام" اللي جا اللول فهاد الدور
هاد الصباح الاثنين 11 ابريل 2022 تأكد رسميا حسب وزارة الداخلية الفرنسية ان ايمانويل ماكرون جا الاول ب27.60 بالمائة من الاصوات وجات مارين لوبين الثانية ب23.41 بالمائة فيما حصل ميلونشون على 21.95 بالمائة. يعني الفرق بيناتهم بدا يكبر.
هادي هي المرة الثانية علي التوالي اللي غادية تكون مواجهة بين ماكرون ولوبين غير هي غادية تكون مختالفة علي 2017. مختالفة حقاش اللي وقع البارح فالانتخابات زلزال فالحياة السياسية الفرنسية. احزاب تقليدية فاليسار واليمين اختافات تقريبا. الحزب الاشتراكي اللي حكم فرانسا مع فرانسوا ميتيران وفرانسوا هولاند جاب قل من 2 بالمائة البارح من خلال ترشيح عمدة باريس أن هيدالگو. هاد الانهيار للحزب بدا من 2017 ولكن دابا تقريبا مشى. هاد الحزب خدا ليه اصواتو كل من ايمانويل ماكرون وجون لوك ميلانشون
اليمين الجمهوري كيف كيسميوه اللي كيمثلوه "الجمهوريون" حتى هو عاش زلزال حقيقي. هاد الحزب حكم فرانسا وكيعتابرو ريوسهم ورثة شارل دوگول ومن بعد كان منهم جيسكار ديسكار وجاك شيراك ونيكولا ساركوزي. هاد الحزب جاب البارح قل من 5 بالمائة من خلال ترشيح ڤاليري بيكريس. اوصات هاد الحزب مشات لليمين المتطرف وبعضها لايمانويل ماكرون
هاد الانتخابات عرفات صعود كبير لليسار الراديكالي وكذلك لليمين الراديكالي اللي كان عندو 3 ممثلين: مارين لوبين وايريك زيمور =جا الرابع ب7 بالمائة ونيكولا ديبون اينيان اللي جاب 2.07 بالمائة. هاد الجوج للخرين علنو على دعمهم لبوبين
فيما دعا الثالث ميلانشون الي قطع الطريق على مرشحة اليمين المتطرف بلا ما يطلب من صحابو يصوتو على ماكرون. الاشتراكيون واليمين الجمهوري بالاضافة الى الحزب الشيوعي الفرنسي والمدافعين على البيئة دعا بصراحة للتصويت على ماكرون