معركة الانتخابات الفرنسية الليلة بين ماكرون ولوبين فالتلفزيون. 23 كاميرا لنقل 140 دقيقة من المواجهة وبلاطو من الف مترو وكلشي توافقو عليه حتى اختيار الصحافية والصحافي اللي غاديين يسولوهم

اليوم معركة حاسمة لاختيار رئيس فرانسا الاحد الجاي. اليوم لاربعا 20 ابريل 2022 غادية تكون معركة فالتلفزيون بين ايمانويل ماكرون ومرشحة اليمين المتطرف مارين لوبان فالجولة الثانية من الانتخابات الرئاسية الفرنسية.
هاد المواجهة توجد ليها بحال اي معركة. المرشحين بجوج عارفين ان اللي خرج فيها رابح عندو حظوظ كبيرة يدي الانتخابات الرئاسية. دابا استطلاعات الرأي كتعطي فوز للرئيس المنتهية ولايتو ماكرون. لكن كلشي ممكن يتغير.
المواجهة توجد ليها وداكرو فريقا المرشحين فكلشي. غادية تبثها "فرانس 2′′ و"تي اف 1" هما اللي وجدو كلشي. طبعا غادي يتم بثها فقنوات اخبارية اخرى ومواقع اخبارية. اللي غادي يقدمها هي الصحافية الفرنسية من اصل لبناني اليا سلامة بنت السياسي اللبناني غسان سلامة. هادي كتمثل "فرانس 2" وجيل بولو عن "تي اف 1". مدتها جوج سوايع و20 دقيقة. هاد الصحافيين بجوجهم تم التوافق عليهم من قبل فريقي المرشحين. يعني هما للي ختاروهم.
كلشي غادي يكون فيها مقسم. كل ثانية من كلام هاد المرشح او داك غادي يتم احتسابها باش بجوجهم يهدرو بالتساوي. تختار ليها ديكور غادي يكون عبارة عن جوج مكاتب. كل مرشح يبرك فمواجهة الثاني. حتى المسافة بيناتهم تحددات فجوج ميترو و50 سنتمتر.
فنقل هاد المعركة مباشرة خدم 200 تقني وغادية تصور فبلاطو بسين سان دوني بباريس وغادي يكون هاد البلاطو مجهز ب23 كاميرا ومساحتو الف متر مربع. هادي 6 ايام وهاد التقنيين خدامين باش كلشي يكون واجد هاد العشية.
كلشي توافقو عليه فريقا لوبين وماكرون٬ حتى المخرج اللي ختاروه: ديديي فرويلي٬ احد اشهر المخرجين فعالم التلفزيون. فهاد المعركة السياسية فالتلفزيون كلشي تفكر فيه. تمنعو شي مشاهد اللي تقدر تبين هاد المرشح او ذاك تالف.
دارت القرعة وعطات باللي مارين لوبين اللي غادية تبدا هاد الديبا التلفزيونية. وتحددات هاد المواضيع وهي 8: القدرة الشرائية والتقاعد والمواضيع الدولية واوربا والامن والهجرة والتعليم والبيئة