تناقضات فتصريحات اب المغربي ابراهيم سعدون لي تحكم بالاعدام على يد الانفصاليين الروس فأوكرانيا: ولدي تستقطب وماتشاورش معانا وكذب علينا.. وفتسجيل صوتي: ولدي ماشي مرتزق ومامشاش باش يتقاتل – فيديو

طاهر سعدون الاب ديال الطالب المغربي ابراهيم سعدون الأسير بيد الانفصاليين ف"جمهورية دونتسك الشعبية" واللي تحكم بالاعدام البارح، دار تصريحات متناقضة.
https://fb.watch/dz05J7cmi7/
الاب قال فتصريح لقناة "اواصر تيفي" لي تابعة لمجلس الجالية :"ولدي طالب مجد وأنا تفاجأت كثيرا بأنه تم استقطابو وغسلو ليه دماغو، فسن مزال صغير، بداية 22 عام، سن كيتعتبر دابا المراهقة، وكنظن ماخصوش يدخل فأمر بين دولتين، والمغرب ماداخلش فهادشي".
وأضاف الاب :"تفاجأت بزاف، ديما كنوصيه باش مايدخلش بين دولتين.. انا غير راضي على هادشي لي دار".
الطالب ابراهيم سعدون كيقرا الثالثة في المعهد ديال دينامية وتكنولوجيا علم الفضاء. قال عليه الاب ديالو :"تلميذ نجيب جدا".
من بعد فالأوديو لي تسرب فواتساي، كيقول فيه بلي ولدو :"اسير حرب وماشي مرتزق، كانو داوهم بزز باش يترجمو ومن بعد داوهم رهائن كيترجمو".
دبا مبقاش ولدو تستقطب ومشا بارادتو مع الجيش الاوكراني، فالتصريح الاول المصور، دبا ولا اسير وداوه بزز.
وتابع الاب ديالو فالفيديو لي سجل مع اواصر :"ولدي كان هو رئيس الحربة باش يهرب مع جوج انجليزيين وفرنسي، لأنه كيعرف الروسية، باش يمشي لدونباس، وقدم راسو باللباس المدني وهادي من الشروط ديال القانون الدولي ".
وتابع :"هادوك لي معه طلبة فنفس المعهد تاهوما عندهم السنة الثالثة، مشاو باش يديرو الترجمة . كل بلاصة صيفطو ليها 3 ولا 4 طلبة، ومن بعد فرضو عليهم".
الاب لي كان عندو منصب مهم فالدرك الملكي، مدير تحريات وبصالير مزيان وكان فالمجموعة ضد الارهاب فاحداث 16 ماي، قال بلي ولدو :"لم يقوم بمشاروات مع والديه، ربما حيت عندو احساس بانه اصبح مسؤولا".
وتابع :"معرفتش شكون استقطبو، ومعرفتش كيفاش استقطب وهاد السن ساهل يتستقطب..."، مضيفا :"مامشاش باش يقاتل بل للترجمة، حيت كيتقن الروسية والاوكرانية".
وبالعودة للفيديو الاب كيقول :"ولدي كذب عليا اول مرة فحياتو، وقالي انا في بولونيا والحقيقة انه كان في اوكرانيا". وقال اعتقد ان المخابرات السرية الغربية هي من استقطبت ولدي ابراهيم.