واش حنا فدولة وكالة أبي رقراق؟. شي حد قال خدام فالوكالة باغي يمنع "كود" من تصوير وطلب منها ترخيص من الوكالة

وكالة ابي رقراق لي عامرة مشاكل، وهادي ماشي مدة باش تعفا مديرها بسبب شبهات طالت ملايير من المال العام بخصوص تنفيذ مشاريع لي كادبرهم هاد الوكالة، اليوم ولات كادير الرقابة وتصيفط ضباط ديالها باش تمنع الصحافة من ممارسة الواجب المهني.
"كود" اليوم تعرضات لنوع من المنع، حيث جا واحد كيقول بلي مخصناش نصورو حيث معندناش ترخيص من وكالة ابي رقراق، وبلي البلاصة فاش كنصورو تابعة ليه.
دبا وكالة ابي رقراق دايرا قانون بوحدها كينظم الصحافة، حسب هاد المستخدم خاص يكون عند "كود" ترخيص من الوكالة. مع العلم أن الترخيص الوحيد باش خدامين فبلادنا هو ديال المركز السينمائي.
طبعا رفض طاقم "كود" هاد الطريقة فالتعامل وقال للمستخدم المنسوب للوكالة بلي هادشي ماشي شغل الوكالة، وبلي مغانجيبوش ترخيص من عندها.
"كود" سولات مصادرها فالسلطة أكدو بلي مكاين تا شي ترخيص من غير ديال ccm المركز السينمائي.
وكالة أبي رقراق المهمة ديالها هي تهيئة واد أبي رقراق، وحتى أسوار مدينة سلا، ومقادراش أنها تمنع ناس ميبولوش على أسوار المدينة ولا دير ليهم طواليطات فين يقضيو الغرض، ولكن قادرة أنها تخدم ناس المهمة ديالهم فينما تبغي تصور شي برنامج ولا شي فيديو لي غادي تبين فيه جمالية المدينة ولا تعرف بها ولا غير فيديو عادي، يجيو عندك ويوقفوك من تصوير ويديرو ليك العرقلة، بحجة أنك ماعندكش رخصة من عند الوكالة، مع العلم أنك عندك رخصة لي عاطياها لك الدولة باش تصور فالمغرب كامل.
واش المغرب باع مدينة سلا لهاد الوكالة باش تحكم فيها كيف بغات وحنا مافرسناش؟.