العبث. مرشح السنبلة المدعوم من لوبي السكن العشوائي باغي يحيد بزز رئاسة مقاطعة طنجة المدينة من الاحرار.. ومصدر حزبي ل"گود": التحالف تشكا للسلطة منو والحمامة هي لي جات لول وتستحق الرئاسة

قبل يوم من جلسة التصويت على رئيس مجلس مقاطعة طنجة المدينة، علمت "گود" ان عدد من المستشارين غبرو وطفاو تلفوناتهم ضد على التحالف الثلاثي لي عطا الرئاسة للاحرار.
القصة ومافيها، حسب مصادر "گود"، هو ان واحد لوبي ديال العقار والسكن العشوائي دار البلوكاج لهاد المقاطعة وباغي يدي الرئاسة بزز.
بلغة الارقام الاحرار جا اللول واكتسح نتائج الانتخابات فهاد المقاطعة، بحيث جاب أكثر من 4600 صوت (8 مقاعد).
مصدر من الاحرار قال ل"گود"، بلي هاد البلوكاج حصل بسبب اللجوء الى بعض الأساليب الدنيئة لي دارها طرف معيت، أمام صمت الجهات المختصة.
وفي هذا الصدد، علمت "گود" بلي قيادة الاحرار ف طنجة، تشكات للسلطات ومعجبهاش تهريب المنتخبين بطرق غريبة والضغط عليهم باساليب غير اخلاقية.
هاد اللوبي واخا مجابش مقاعد كثيرة، بانت ليه ف البي جي دي، باش يتحالف معه ويطيح مرشح الاحرار المدعوم من التحالف الثلاثي.
العبث وصافي، مرشح عندو شبهات كثيرة وحتى مباغيهش، ونهار الخميس لي فات، اي يوم التصويت للي داز جاب معه الفيدورات، فالاخير تقوالب حيث التحالف الثلاثي قرر يقاطع جلسة التصويت. مكانش النصاب.
وفي هذا الصدد، قال مصدر حزبي ل"گود" :"كيف يعقل اسناد مرافق حيوية ( ميناء طنجة، الملعب الكبير لطنجة، لاكوط..) لأشخاص لا تتوفر فيهم أدنى شروط النزاهة.
دبا اللي مقلق الاحرار هو استمرار اختفاء المنتخبين، واللي كولشي كيقول داهم المرشح ديال الحركة الشعبية، الشرقاوي، وجمعهم فشي بلاصة.
كيفاش واحد متحالف مع لوبي البناء العشوائي باغي بزز يدي الرئاسة ديال هاد المقاطعة، واخا مجابش لا رتبة اولى ولا عندو تحالف، فقط كيخلع المنتخبين وصافي.
غذا كاين التصويت على رئيس المقاطعة ديال المنطقة الحساسة، خصها تعطا لناس نقيين وللأطر، خصوصا وان القيادي فالاحرار فطنجة مورو دار حملة نقية وجاب اطر ودا اغلبية، وهاد المقاطعة اكتسحها.
الحمامة كتشكا من هاد التصرفات الغبية للي داير الطرف الاخر.