فيديو صادم.. عاوتاني بوليسي تيرا بالقرطاس على ولد أسمر فميريكان وناضت عليه الروينة

البوليس فمدينة شيكاكَو فميريكان عوتاني قفرها واحد منهم بعدما تيرا بالقرطاس على ولد أسمر عمرو 13 لعام وهو واقف وهاز يديه.
الجريمة وقعات فشهر ماي الفايت وكان فداك الوقت موقع "ديلي بيست" الميريكاني نشر فيديو ديال العملية، ودبا تلاح مقطع جديد ديال كاميرات مراقبة على نفس الاعتداء وانتاشر بزاف خصوصا فموقع "تويتر" والميريكانيين تفاعلو معاه، واعتابروه جريمة عنصرية من البوليسي اللي قرر يتيري فدري مراهق صغير واخا كان مستسلم وهاز يديه.
وقالو بزاف منهم بللي هادي غير حلقة من سلسلة جرائم عنصرية تورطو فيها بعض عناصر البوليس فميريكان واللي كثرات مؤخرا.
عائلة الضحية رفعات دعوى قضائية ضد البوليس، واتهماتهم بمحاولة القتل، لأن ولدها ما كانش هاز لا سلاح لا والو وماكانش كيهدد حتى شي واحد.
وقال محامي العائلة بللي الضحية المراهق، وسميتو "A.G"، احتمال كبير مايبقاش يقدر يعاود يتمشى على رجليه حياتو كاملة من بعد إصابتو بجروح خطيرة فالعمود الفقري، وبللي فعلا دبا رجليه ما كيحركهومش.