بسباب الغلا ولاكريز.. ميريكانيين قلبوها شفرة ديال ليصانص من السطاسيونات – فيديوهات

مع الارتفاع الكبير فثمن ليصانص والمازوط، عدد من الميريكانيين قلبوها شفرة من سطاسيونات وكيعاودة فيه البيع عبر مواقع التواصل الاجتماعي.
وهادي شهرين أو أكثر فاش قرقب البوليس على شبكات احتارفات هاد الشفرة واستافدو منها حتى أشخاص عاديين.
ومن جديد تشدو جوج متورطين فولاية فرجينيا بتهمة سرقة كميات كبيرة من ليصانص وصلات قيمتها آلاف الدولارات من محطة وقود محلية مسدودة.
وقال موقع "إنسايدر" الميريكاني، بللي المعتقلين استعملو "أدوات خاصة" باش يجبدو ليصانص من البومبات، ومن بعد باعوه بثمن ناقص بزاف، وكانو كيروجو لسلعتهم المشفورة على شبكات التواصل الاجتماعي.
ومنهم اللي بيراطاو البومبات (اللي خدامين بسيستيم Pay at the pump) بعدما كيسدو السطاسيونات بالليل، وكيبداو خدامين كيسربيو فليصانص بثمن طايح بزاف على السوق.
وذكرات أيضا وسائل إعلام فميريكان، بللي كاميونات فيها أجهزة خاصة "تستعملات فشفرة عشرات الآلاف ديال الكَالونات" من سطاسيونات فلاس فيكَاس خلال الشهورة الفايتة، وتفرش هادشي مللي شكو البوليس فأشخاص كيبقاو بطوموبيلاتهم لأكثر من ساعة عند البومبات دليصانص، ومع ذلك فاللخر كيخلصو غير 20 دولار، وبان ليهم لاحقاً بللي هاد الناس كانو كيعمرو صهاريج مخفية وماشي غير ليريزيفوار ديال طوموبيلاتهم.