حكم ماعندو معنى. عامين نافذة لفاطمة كريم بتهمة ازدراء الأديان.. المعتقلة: ماكنفيهاش وكنعتبرها تعبير حقيقي عن رأيي.. وخوها ل"كود": ختي علمانية وزارت اسرائيل ومكانتش ملمة بالقانون الجنائي

كشف بوعزة كريم، خو المقاولة فاطمة كريمة اللي تحكمات بعامين ديال الحبس نافذة بتهمة ازدراء الأديان والإساءة إلى الدين الاسلامي، عن غياب أي شكاية ضد ختو.
واعترفت فاطمة كريم، أثناء البحث والاستماع ضمن محضر قانوني، بالمنسوب اليها جملة وتفصيلا، وقالت إن القصد من نشر تدويناتها موضوع البحث ماشي التأثير على المسلمين أو زعزعة عقيدتهم بل هي بغات من خلال التدوينات ديالها تعبر غير على رأيها الحقيقي بكل حرية".
وقال بوعزة كريم في اتصال مع "كود" : "ختي معندهاش المام بالقانون الجنائي وتعبر عن رأيها وهي حرة، وانا كنختالف معها وعمرني وقفت ضدها او حبستها". مضيفا :"تناقش احاديث البخاري وكتامن بالعلمانية وتميل للديانة اليهودية، وكنعتبر ارائها تعبير حر ونختلف معها، واخا هي مقراتش القانون الجنائي وغير ملمة به ومستواها الدراسي ماشي كبير".
وتابع المتحدث ل"كود" :"ختي معندهاش ادنى نية بلي غاتسيء للقانون او للدولة ومؤسساتها، ولم تكن تظن بلي هاد التدوينات غاتديها للاعتقال نيشان"، مضيفا :"كتسكن بوحدها وعندها مشروعها التجاري وهي كتستعد تفتح مشروع جديد بعدما خدات الموافقة مع العامل ديال خريبكة".
وشدد خو المعتقلة ل"كود" :"الوالدين فحالة يرثى لها نفسيا، ومعارفينش شنو يديرو"، مشددا بأن المعتقلة مكان عندها مشكل مع حتى واحد، من غير ملف فالمحكمة التجاري حول نزاع عقاري ربحاتو فوقت سابق.
وأضاف المصدر نفسه، جوابا على سؤال "كود" حول تعاطف المعتقلة مع اسرائيل، بالقول :"منذ اتفاقية ابراهام، عبرت أختي عن دعمها لهذا التوجه وزارت اسرائيل مباشرة بعد التوقيع على الاتفاقية".
وقضت المحكمة الابتدائية بمدينة واد زم، يوم أمس الإثنين، بعامين حبسا نافذة، في حق المدونة الفيسبوكية فاطمة كريم، بتهمة "إزدراء الأديان والإساءة إلى الدين الإسلامي" بناء على الفصل 267 من القانون الجنائي بعد متابعتها في حالة اعتقال.
هاد الحكم القاسي سبابو هو هاد القانون الجنائي لي باقي كثر من 30 عام متبدلش، قانون كيمنع الانسان المغربي يعبر بحرية عن القضايا لي كتشغل بالو عقلو وقلبو.