سكوب. فضيحة كبيرة بطلتها نوطيرة مرات خو فنان مشهور مشى للكوميسارية باش يخرجها. كتعذب خادمات من اندونيسيا ومتابعة بالاتجار بالبشر=صور حصرية

علمت “كود” ان نوطيرة مرات خو فنان وملحن معروف كتسكن ففيلات فحي الرحمة فكازا طاحت ودابا موجهة ليها تهمة الاتجار بالبشر. هاد القضية تفرجات بداية هاد الاسبوع بعد ما مشات هاد النوطيرة عند الاستعلامات العامة ديال حي الرحمة باش تاخد لوطوريزارسيون للسفر لخادمة جابتها من اندونيسيا عن طريق هادوك الوكالات. الاستعلامات العامة وفق مصدر “كود” اكتشفات باللي هاد البنت فشي شكل. سولو لقاوها كلها زرگة. بلغو النيابة العامة. تعذيب كبير تعرضات ليه. سولو وبحثو اكتاشفو باللي خادمة اخرى قبل منها كانت اتهماتها نفس النوطيرة ومرات خو هاد الفنان بشي حاجة ومشات فيها للحبس مسكينة 3 اشهر. هاديك حتى هي كانت تعرضات للتعذيب بزاف.
لقاو حتى ام هاد النوطيرة عندها خدامة من نفس الدولة وكتعاني نفس المعاملة الحاطة من كرامتها.
وفق مصدر “كود” ان هاد الفنان بكل وقاحة وحقارة جا للكوميسارية باش يخرج مرات خوه. غير لقى باللي النيابة العامة اللي حالت الملف على الفرقة الجنائية الولائية وعرف باللي التهمة الاتجار بالبشر وهو يحشم ولكن غير شوية وصافي.
دابا هاديك النوطيرة راها فالبيقة ويمكن حتى امها والتهمة اليوم هي الاتجار بالبشر.
تفاصيل تجيبها ليكم كود لاحقا