الطالياني ماتزاري طار لبلادو والمغاربة مازال كيتسناو شكون غايدرب المنتخب

خرج الإيطالي والتر ماتزاري من لائحة المرشحين لتدريب المنتخب الوطني المغربي فالمرحلة المقبلة، وهذاشي اللي كشفاتو تقارير ايطاليا، وقالت أن المفاوضات ما بين المدرب الإيطالي والجامعة الملكية المغربية لكرة القدم وصلت للطريق المسدود.
جريدة "فوتبول ايطاليا" كشفت على أن الإيطالي والتر ماتزاري، كان قريب من تولي مهمة تدريب المنتخب الوطني المغربي، وأن المدرب الإيطالي كانت عندو رغبة كبيرة من أجل تدريب ليكيب ناسيونال فالمونديال ديال قطر.
المصدر نفسو قال على أن والتر ماتزاري واللي عندو 60 عام، كان معقول وجدي فالمفاوضات ديالو مع الجامعة، حيث كان باغي يخدم قبل كأس العالم، لكن الصفقة فشلت ما بين الطرفين من بعدما وصل التفاوض لمراحل نهائية.
ومن بين الأشياء اللي ساهمت فانهيار المفاوضات ما بين ماتزاري والجامعة حسب نفس الجريدة، أن المدرب الإيطالي كان باغي يجلب معه الطاقم التقني ديالو فالوقت لي الجامعة حددت من قبل أفراد الطاقم التقني اللي غيعمل مع المدرب الجديد.
وبالإضافة لهاذشي وحسب نفس المصدر دائما، فالجامعة الملكية المغربية لكرة القدم بغات توضع شروط معينة فالعقد ديالها مع ماتزاري، ومنها الشرط ديال الانفصال عليه فحالة الفشل ديالو فقيادة المنتخب الوطني المغربي للدور الثاني من كأس العالم.
وأكدت الجريدة أن والتر ماتزاري ومن بعد الوصل لهاذ المرحلة، قرر التراجع عن فكرة تدريب المنتخب المغربي، وشد الطيارة ورجع لإيطاليا وكاينتظر تجيه عروض وفرص أخرى.
من جهة أخرى فمن بعدما قامت الجامعة الملكية المغربية لكرة القدم بالانفصال على وحيد حاليلوزيتش، أكدت مصادر مطلعة على أن الناخب الوطني اللي غيكون فالمرحلة المقبلة مع المنتخب الوطني المغربي هو المدرب السابق ديالو الوداد الرياضي وليد الركراكي، وغيساعدو طاقم تقني مكون من كل من عادل رمزي المدرب ديال ليسبوار فايندهوفن الهولندي والإطار الوطني رشيد بنمحمود، وإلى حدود الآن مازال المغاربة كينتاظرو الاعلان على الهوية ديال الناخب الجديد بشكل رسمي خصوص وأن كأس العالم ما بقاش له وقت كثير.